Frutat dhe perimet shqiptare – Peleshi: Nga më të kërkuarat në tregjet europiane

Frutat dhe perimet shqiptare po shohin një fluks të madh kërkesash nga tregjet e ndryshme europiane me standarde të larta. Deklarata ka ardhur nga ministri i Bujqësisë dhe Zhvillimit Rural, Niko Peleshi, gjatë vizitës së tij në disa ferma dhe pika grumbullimi në zonën  e Lushnjës dhe Divjakës. Sipas Peleshit, kjo kërkesë e madhe vjen si rezultat i cilësisë së lartë të këtyre produkteve.

“Kërkesa është e madhe, por akoma më e madhe është nevoja që ne kemi për t’i mbështetur këto kompani, që janë të gatshme të investojnë për shkak se tregu e mundëson edhe produktet shqiptare janë siç e thashë, gjithmonë e më të kërkuara në rajon. Prodhimet tona sot gjenden në vendet e Bashkimit Evropian, në Suedi, në Çeki, në Itali, në Rumani, Bullgari, Greqi, Zvicër dhe shumë vende të tjera. Shkalla e reklamimit është pothuajse e papërfillshme, pra kthimi i prodhimeve tona pothuajse nuk është fare si fenomen, çka do të thotë, se kur një produkt konsumohet në tregjet me standarde shumë të larta, siç janë tregjet e Bashkimit Evropian, padyshim që duhet të konsiderohet i sigurt dhe i garatuar dhe për konsumatorin shqiptar”, u shpreh Peleshi.

Ky i fundit shtoi se do të forcohen kontrollet përmes Autoriteti Kombëtar të Ushqimit në momentin e vjeljes apo në pikat e grumbullimit. Ndërkohë, më tej shprehu kërkesën e tij për mediat që të pasqyrojnë realitetin 360 gradë, jo vetëm me lajme negative, por edhe ato pozitive, duke shtuar se pas këtyre të fundit qendron një punë e lodhshme për arritjen e këtyre rezultateve për vendin.

“Për prodhimet shqiptare situata nuk është ajo që perceptohet nga ndonje lajm i ndonjë emisioni investigativ, që bën një punë për t’u lavdëruar në fakt, situata është krejt ndryshe.E di që lajmi pozitiv ndonjëherë nuk është shumë interesant për mediat, por ja që duhet të bëhemi të gjithë bashkë, për ta rritur dhe për ta mbështetur këtë sektor, i cili na jep 20 % të prodhimit të brendshëm bruto të vendit tonë”, tha ndër të tjera ministri.

G.D/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.