Fshirja e detyrimeve tatimore – Tatimet, dy ndërhyrje në sistem gjatë muajit shtator
Janë mbi 111 mijë biznese që do përfitojnë fshirje të plotë apo të pjesshme të detyrimeve që i kanë administratës tatimore nga implementimi i ligjit të faljes. Kështu sipas burimeve nga Drejtoria e Përgjithshme e Tatimeve, gjatë këtij muaji do të ketë dy ndërhyrje në sistemin elektronik të tatimeve për të fshirë detyrimet që lindin nga ky ligj.
Sipas tyre borxhi tatimor që pritet të fshihet nga efektet e këtij ligji janë 14 miliardë lekë. Kryesisht do të fshihen përfundimisht detyrimet e atyre bizneseve që kanë që para vitit 2010. Ligji parashikon heqjen e gjobave për mosdeklarim në afat, për deklaratat e padorëzuara të çdo periudhe tatimore.
Në datën 6 Maj 2017, ka hyrë në fuqi ligji “Për pagesën dhe fshirjen/shuarjen e detyrimeve tatimore, detyrimeve të pagueshme në doganë, si dhe procedurën e heqjes nga qarkullimi të mjeteve të transportit pas fshirjes/shuarjes së detyrimeve tatimore”.
Administrata tatimore bën me dije se përfitues nga ky ligj janë tatimpaguesit e regjistruar në regjistrin aktiv dhe atë pasiv, me përjashtim të atyre që janë dënuar me vendim gjyqësor të formës së prerë për vepra penale në fushën tatimore dhe/ose doganore, në kuptim të legjislacionit të fushës.
Ndërkohë sipas Tatimeve, në ndërhyrjen e parë në sistem për fshirjen e detyrimeve kanë përfituar 105 mijë sipërmarrje.
Violeta Shqalsi/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.