FSHZH informon se kur do të përfundojnë punimet në zonën kryesore të Durrësit (FOTO)  

Fondi Shqiptar i Zhvillimit informon lidhur me ecurinë e projektit për rikonstruksionin e plotë të sheshit “Taulantia” në Durrës. Sipas FSHZH-së, punimet po vijojnë me ritëm të lartë, në zonën me kryesore të qytetit të Durrësit.

“Aktualisht punimet për këtë objekt janë fokusuar në këto procese:

– realizimi i mbrojtjes detare me gurë, përgjatë murit të betonit në zonën 1 dhe 2,

– gërmime dheu dhe sistemime zona 1,

– betonim i shkallareve buzë detit, si dhe çmontimi i pllakave të amortizuara të trotuarit ekzistues në zonën 1.

– Ndërkohë paralelisht në zonën 2 po punohet me piketime sipas projektit dhe në proceset: mbushje me çakull, ngjeshje me rrul, lidhje hekuri, si dhe vendosje armature” njofton FSHZH.

Me një numër të konsiderueshëm turistësh në çdo sezon të vitit, ndërhyrja në këtë zonë synon një zhvillim të mëtejshëm të qytetit, në drejtim të ekonomisë, turizmit dhe aktiviteteve sociale.

“Nisur nga statistikat në veprimtarinë e Portit të Durrësit, kanë mbërritur vetëm gjatë një të diele, 623 turistë nga 28 vende të botës. Shifra të cilat dëshmojnë se qyteti është kthyer në një nga destionacionet, i vizitueshëm në çdo stinë të vitit” evidentohet në njoftimin e FSHZH-së.

Rikonstruksioni i Sheshit “Taulantia” po zbatohet nga Fondi Shqiptar i Zhvillimit në kuadër të projektit; Investime Prioritare me Impakt në Zhvillimin dhe Promovimin e Turizmit.

Me financim të Qeverisë Shqiptare kjo ndërhyrje pritet të përfundojë vitin e ardhshëm, duke rijetëzuar jo vetëm zonën në projekt, por gjithashtu duke ripërcaktuar raportin e këtij qyteti me detin.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.