“Fuqia” e votës – 3.4 milionë shqiptarë drejt kutisë për zgjedhjet 2017
Shqiptarët do të zgjedhin këtë të dielë përfaqësuesit që do t’i drejtojnë në katër vitet e ardhshme.
Sipas listës përfundimtare të publikuar nga Ministria e Brendshme të drejtën e votës e kanë 3.452.308 shtetas ku për herë të parë votojnë 136 651 zgjedhës.
Në raport gjinor të paktën 51% e zgjedhësve janë meshkuj dhe 49% femra. Në fund të majit ministria e Brendshme deklaroi se ka një seri përmirësimesh në listën përfundimtare për zgjedhjet e 25 qershorit 2017 krahasuar me listat e zgjedhjeve të 2013 dhe ato vendore 2015.
Kështu këto përmirësime lidhen me uljen e numrit të shtetasve pa adresë të përcaktuar, i dublikimeve, e po ashtu edhe i votuesve mbi 100 vjeçarë.
Nga lista e re janë hequr gjithashtu emrat e personave që vuajnë dënimin në burgje, sipas përcaktimeve të ligjit, në kuadër të ‘dekriminalizimit’.
Në shifra këto korrigjime rezultojnë : Në listën përfundimtare të zgjedhësve të vitit 2013 kishte 2.948 dublime të dyshuara, në listën përfundimtare për zgjedhjet e 25 Qershorit 2017 ka 459 dublime.
Subjekte të bllokuara si objekt për herë të parë i ligjit të dekriminalizimit në listën përfundimtare për zgjedhjet e 25 Qershorit 2017 janë 1367.
Po kështu në mënyrë informatike janë bllokuar në listën e zgjedhësve 1489 persona që kanë mbushur moshën 100 vjeç.
Nertila Maho/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.