Fuqizohet ekonomia e Japonisë – Periudha më e gjatë e rritjes që prej krizës së viteve ’80
Ekonomia e Japonisë, e treta më e madhe në botë, ka treguar rritjen më të gjatë në kohë që prej vitit 1980, ndërkohë që tremujori i katërt 2017 u nxit nga shpenzimet konsumatore. Performanca e fortë po inkurajon Bankën e Japonisë, duke i dhënë sinjale se vrulli ekonomik mund të nxisë çmimet e konsumit drejt objektivit prej 2%.
Ekonomia e Japonisë u rrit me 0.5% në tremujorin e katërt krahasuar me të njëjtën periudhë të një viti më parë, megjithatë poshtë vlerësimeve të analistëve për një rritje me 0.9%. Për vitin e plotë 2017, ekonomia e tretë më e madhe në botë u rrit me një normë reale prej 1.6%, që është më e larta që prej vitit 2013.
Rritja e zgjatur e ekonomisë ka nxitur disa spekulime se Banka e Japonisë mund të reduktojë stimujt monetarë, megjithatë analistët thonë se nuk ka gjasa për sa kohë që jeni rritet dhe inflacioni qëndron i dobët. Ndër bankat qendrore më të mëdha në botë, përfshirë Rezervën Federale dhe Banken Qendrore Europiane, Banka e Japonisë pritet të mbetet pas në procesin e tkurrjes monetare.
Dollari ra në nivelin më të ulët në 1 vit e gjysmë kundër jenit këtë javë, duke ulur çmimet e importeve dhe ndikuar negativisht te eksportuesit e vendit. Ekonomia ka treguar periudhën më të gjatë të rritjes që prej ekspansionit me 12 tremujorë radhazi në vitet 1986-1989, përpara se të niste kriza famëkeqe e Japonisë.
Sipas të dhënave, rritja e shpenzimeve në aparatë celularë, makina dhe në restorante, ka sjellë rritjen e konsumit privat, që përbën 2/3-ën e Produktit të Brendshëm Bruto. Tregtia ka ndikuar negativisht në tremujorin e katërt, ndërkohë që eksportet u rritën me 2.4% dhe importet me 2.9%, falë kërkesës së fortë brenda vendit.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.