Furnizim me ujë të pastër pa ndërprerje – FSHZH: Fillon zbatimi i programit edhe për Himarën dhe Orikumin
Fondi Shqiptar i Zhvillimit njofton se pas një ndërhyrje të suksesshme të Programit të Ujësjellësve Ruralë III, me shtrirje në të gjithë vendin për rrjetin e furnizimit me ujë të pastër higjenikisht, pa ndërprerje dhe me tarifa ekonomike për konsumatorët, ka filluar zbatimi i Programit të Ujësjellësve Ruralë IV edhe për bashkitë e Himarës & Orikumit.
FSHZH bën me dije se mbi 80,000 banorë dhe turistë do të përfitojnë nga furnizimi me ujë të pijshëm 24 orë sipas standardeve higjieno-sanitare dhe nga ndërtimi i linjave të furnizimit me ujë, sistemeve të shpërndarjes, si dhe rezervuarëve e stacioneve të pompimit. Sipas informacionit të publikuar ky projekt do të ketë gjithashtu një impakt pozitiv në mjedis falë ndërtimit të dy HEC-eve të vegjël në Himarë, duke kontribuar në prodhimin e energjisë së rinovueshme dhe mbrojtjen e mjedisit.
Sipas njoftimit programi me vlerë prej 45.15 milion euro, financuar nga KfW dhe WBIF do të zhvillohet në 4 Lote si vijon:
Loti 1: Bashkia Himarë – Furnizim me Ujë
- Vepra e marrjes së ujit në burimin e Lepushës
- Linja kryesore e transmetimit nga Lepusha në degëzimin e Himarës
Loti 2: Bashkia Himarë – Furnizim me Ujë
- Ndërtimi i linjës kryesore deri në Kuç, Pilur, Kudhës, Himarë Fshat, Vuno, Livadh, Jalë, Borsh
- Ndërtimi, zgjerimi i sistemeve të shpërndarjes në Himarë, Himarë Fshat, Vuno, Livadh, Jalë, Borsh, Qeparo
- Prodhimi i energjisë në dy HEC-e të vegjël në Himarë
Loti 3: Bashkia Himarë & Orikum – Kanalizime Ujëra të Ndotura (KUN)
- Rehabilitimi dhe shtrirja e sistemit të KUN Himarë
- Ndërtimi i impiantit për trajtimin e ujërave të ndotura (ITUN) me trajtim mekanik-biologjik
- Shkarkuesit në det (pas trajtimit, larg bregut) në Himarë dhe Orikum
Loti 4: Bashkia Orikum – Furnizim me Ujë + Kanalizime Ujëra të Ndotura (KUN)
- Ndërtimi i puseve, linjës së transmetimit, rrjetit të shpërndarjes, rezervuarëve, lidhjeve të shtëpive
- Ndërtimi i kolektorit bregdetar, rrjetit KUN, stacioneve të pompimit dhe lidhjeve të shtëpive
- Rehabilitimi/zgjerimi dhe vënia në funksion e impiantit për trajtimin e ujërave të ndotura (ITUN)
FSHZH informon se ky projekt përbën një investim serioz dhe të shumëpritur si nga banorët, ashtu dhe nga pushuesit, që prej 20 vjetësh vuanin mungesën e investimeve në këtë sektor, dhe si rrjedhojë mungesën e ujit të pijshëm dhe të kanalizimeve dhe falë këtij programi, i cili do të mbështesë zhvillimin e qëndrueshëm në këto bashki do të arrihet mbulimi i furnizimit me ujë të pijshëm gjatë 24 orëve. Për herë të parë bregdeti i Himarës, do të ketë një pastërti të ujërave të detit sipas standardeve europiane.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.