Furnizimi me ujë, Veliaj: Linja e re e Shën-Mërisë rrit prurjet në rrjet
Bashkia e Tiranës ka nisur një investim strategjik për të rritur kapacitetin e prurjeve nga burimet në Malin e Dajtit, duke ulur në të njëjtën kohë edhe kostot financiare.
Ky projekt që ka të bëjë me ka të bëjë me shfrytëzimin më të mirë të burimeve të Shën Mërisë është dhe një hap më shumë drejt objektivit për furnizimin pa ndërprerje me ujë të pijshëm të kryeqytetasve.
Gjatë inspektimit të punimeve në terren, kryebashkiaku Erion Veliaj theksoi se për të bërë të mundur këtë projekt po hapet edhe një tunel rreth 2 km i gjatë, i cili do të mundësojë kalimin e tubacionit dhe rënien e lirë të ujit drejt Tiranës.
Kryebashkiaku i Tiranës tha se gjatë këtij viti UKT do të shtojë kapacitetin e filtrimit të ujit të pijshëm edhe në impiantin e Bovillës, duke mundësuar furnizim më të mirë me ujë të qytetarëve të Tiranës. Sipas projektit të miratuar, do të ndërtohet një linjë e re transmetimi me gjatësi rreth 18 mijë metra linear dhe një tunel në malin e Dajtit me një gjatësi rreth 2 km.
Gjithashtu, do të ndërtohet edhe baseni i grumbullimit të ujërave për Hidrocentralin e Lanabregasit.
Elisabeta Dosku/RTV SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.