Fushata e vaksinimit në Itali. Administrata e re e Draghi, mund të ndjekë shembullin e Boris Johnson
Administrata e kryeministrit të ri Italian, Mario Draghi, pritet të përshpejtojë programin e vaksinimit ndaj Covid-19, duke u frymëzuar nga fushata britanike, në përpjekje për të përmbajtur përhapjen e virusit. Sipas të përditshmes La Stampa, në një takim të kabinetit në nisje të Javës, qeveria e re italiane do të ndjekë shembullin e qeverisë së Boris Johnson dhe do vazhdojë me vaksinimin në mnasë, duke përdorur të gjithë dozat e disponueshme, pa lënë mënjanë disa nga vaksinat për doza të dyta. Deri më tani, mbi 17 milionë njerëz janë vaksinuar në Britani, rreth 30% e popullsisë adulte, duke e bërë vendin një lider botëror në vaksinimin ndaj Covid, ndërkohë që Italia ka vaksinuar vetëm 3.5 milionë.
Në fundjavë, liderët rajonalë në Itali i bënë thirrje qeverisë që të rrisë përpjekjet për të gjetur më shumë doza të vaksinave. Sipas një deklarate nga këshilluesi i shëndetësisë për rajonin e Lazios, Alessio D’Amato, AstraZeneca ka lajmëruar një shkurtim të dërgesave të ardhshme të vaksinave për rajonin në vetëm 9,000 doza. Në mënyrë që të përshpejtohet fushata, italia mund të konsiderojë përdorimin e të gjithë vendndodhjeve të mundshme publike dhe private, përfshirë stacionet e trenit dhe zonat e parkimit, sipas mediave lokale. Takimi i kabinetit do të vendosë gjithashtu për të zgjatur përtej 5 Marsit ndalimin e lëvizjes mes rajoneve dhe do diskutojnë më shumë masa kufizuese për të frenuar infeksionin.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.