Fushatë ndërgjegjësuese për Autizmin – Fondacionit “Fëmijët Shqiptarë” i bashkohet kombëtarja shqiptare

Në prag të ditës ndërkombëtare të Autizmit, djemtë e Kombëtares shqiptare të futbollit i janë bashkuar kauzës ndërgjegjësuese të Fondacionit Fëmijët Shqiptar për më shumë mbështetje dhe integrim ndaj fëmijëve dhe individëve që jetojnë më çrregullim të spektrit autik.

Të kryesuar nga Zv.Presidenti i Federatës Shqiptare të Futbollit Edvin Libohova, sekretari i FSHF Ilir Shulku  dhe trajneri Kristian Panuçi,  djemtë e kombëtares kanë zbritur në qendrën Rajonale për Autizmin në Farkë ku janë pritur nga presidentja e Fondacionit Dr.Liri Berisha si dhe janë takuar me fëmijët që marrin terapi aty dhe prindërit e tyre. Djemtë e kombëtares pasi panë nga afër ambientet ku ata marrin shërbime, improvizuan një ndeshje të shpejtë futbolli me ata më të rriturit dhe shkëmbyen fanellat e kombëtares me ato të fondacionit .

Presidentja Fondacionit Fëmijët Shqiptar Dr. Liri Berisha pasi falënderoi Federatën për këtë mesazh të fortë mbështes ndaj kauzës së Autizmit, i cilësoi djemtë e kombëtares si ambasadorët më të mirë të kombit në rritjen e ndërgjegjësimit dhe përhapjen e humanizmit ndaj fëmijëve më aftësi të kufizuara.

Trajneri i Kombëtares Kristian Panuci e vlerësoi si shumë të nevojshëm vendosjen e sportit në funksion të rritjes së ndërgjegjësimit ndaj kauzave që prekin njerëzit në nevojë.

Zv.Presidenti i Federatës Shqiptare të Futbollit Edvin Libohova, duke përshëndetur misionin e përkushtuar të  Fondacionit Fëmijët Shqiptar në fushën e Autizmit, tha se sporti i ka dhënë gjithmonë zë mesazheve për më shumë humanizëm dhe mbështetje ndaj personave në nevoje.

Në fund djemtë e kombëtares dhe stafi i fondacionit thirrën një zëri “Ndriço Blu për Autizmin”, veprim simbol ky që rrit vetëdijen e publikut dhe atë shtetërore për më shumë vëmendje dhe mbështetje ndaj individëve të prekur nga ky çrregullim.

Entela Barjamaj/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.