G20, pa marrëveshje për klimën / Cingolani: Negociatat me Kinën, Rusinë dhe Indinë shumë të vështira
Ministrat e Mjedisit dhe të Energjisë të 20 ekonomive më të mëdha në botë nuk ranë dakord mbi formulimin e një angazhimi të përbashkët mbi ndryshimin klimatik, në komunikatën e tyre përfundimtare, deklaroi Ministri italian i Tranzicioni Ekologjik, Roberto Cingolani. Ai u shpreh përpara gazetarëve se ministrat e G20-ës që u mblodhën për dy ditë në Itali nuk kishin arritur të zgjidhnin dy pika të diskutueshme dhe për këtë duhet të takohen krerët e shteteve dhe qeverive për të vendosur. Ai shtoi se negociatat me Kinën, Rusinë dhe Indinë kanë qënë veçanërisht të vështira dhe një ndër pikat më të diskutuara ishte formulimi i kufirit prej 1.5-2 gradë celsius të rritjes së temperaturave, sipas marrëveshjes së Parisit të vitit 2015. “Këto vende nuk dëshironin të nënshkruanin paragrafin që thoshte: ‘ne do të bëjmë më të mirën tonë për të mbajtur temperaturat poshtë 1.5 gradë deri në fund të dekadës’. Ata thanë vetëm që do të respektojmë marrëveshjen e Parisit”, deklaroi Cingolani për gazetarët. Takimi i G20-ës vlerësohet si faza vendimtare përpara bisedimeve të Kombeve të Bashkuara për klimën, që zhvillohet në nëntor në Gllasgou.
Lidion Kulla – SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.