Gallup: Shqiptarët më mikpritësit në rajon, pro hapjes së dyerve për sirianët

Gallup International, një ndër kompanitë më prestigjioze në nivel global për zhvillimin e anketave, ka publikuar një të tillë sa i përket qëndrimit që kanë popujt e Europës lindore për refugjatët sirianë.

Anketa tregon se, sa do t’i mirëprisnin realisht në vendin e tyre, qytetarët e 16 shteteve këta refugjatë. Në analizë merret edhe Shqipëria së bashku me të gjitha vendet e tjera të rajonit.

Rezultati i anketës tregon se, shqiptarët e Shqipërisë dhe ata të Kosovës, së bashku me kroatët dhe boshnjakët janë ata të cilët janë më të predispozuar për t`i hapur dyert sirianëve. Madje, me diferencë të theksuar me vendet e tjera.

Në këto katër shtete regjistrohet norma më e ulët e atyre që janë kundër hapjes së dyerve dhe norma më e lartë e atyre që i mirëpresin.

44% e shqiptarëve të Shqipërisë, dhe 38% e shqiptarëve të Kosovës shprehen se nuk do të donin që sirianët të vinin në vendin e tyre, dhe kjo është norma më e ulët në rajon, bashkë me kroatët dhe boshnjakët.

Kur çështja shtrohet ndryshe: pra që vendi i tyre të pranonte një numër të kufizuar të refugjatëve sirianë, shqiptarët janë sërish ndër të parët. Në Shqipëri 45% janë pro kësaj zgjidhje, dhe në Kosovë 49%. Në mes hyn vetëm Greqia, me 47%.

Vendet më jomikpritëse ndaj refugjatëve sirianë në rang rajonal janë: Hungaria, Maqedonia dhe Mali i Zi.

Përgjigjet e anketës janë mbledhur vitin e kaluar, pas marrëveshjes mes Turqisë dhe Bashkimit Europian, çka do të thotë se, përgjigjet e qytetarëve janë dhënë në një kohë shqetësimi të madh.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.