Gara globale/ Merkel shpreh shqetësimin për vaksinat për vendet e varfëra të botës
Kancelarja gjermane Angela Merkel ka shprehur shqetësimin sesi vendet më të varfëra të botës do të mund të sigurojnë vaksinën kundër Covid. Në fjalën e mbajtur në samitin e G20, pavarësisht premtimeve të liderëve për një shpërndarje të drejtë të vaksinës, Merkel paralajmëroi se progresi është i ngadaltë dhe se këtë çështje do ta ngrinte si diskutim me aleancën globale për vaksinën GAVI.
“Në do të flasim me aleancën GAVI se kur do të nisin bisedimet sepse jam e shqetësuar se nuk është bërë ende asgjë” është shprehur ajo. Këto komente të Merkel vijnë në një kohë kur Shtetet e Bashkuara të Amerikës kanë njoftuar se disa amerikane mund të nisin të vaksinohen pas pak ditësh, në fillim të muajit dhjetor.
Samiti i G20 që mbledh shtetet më të fuqishme të botës ekonomikisht u organizua nga Arabia Saudite. Për shkak të pandemisë, takimet u mbajtën virtualisht. Gjatë konferencës, vendet më të pasura të botës premtuan mbështetje për vendet e varfëra, eknomitë e të cilave janë dëmtuar rëndë nga kriza, por dhanë shumë pak detaje se si do të jepej kjo mbështetje. Virusi ka infektuar afërsisht 60 milionë njerëz përreth botës që nga dhjetori i kaluar dhe ka vrarë thuajse 1.4 milion njerëz.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.