Garancia ndryshon në favor të bizneseve – Qeveria do të shlyejë interesat ndaj bankave një herë në tre muaj
Qeveria ka bërë disa ndryshime në kriteret për përfitimin e garancisë sovrane prej 11 miliardë lekësh nga ana e bizneseve të prekura nga COVID-19. Ndryshmet e bëra do të reflektohen edhe në marrëveshjet e që janë lidhur midis sipërmarrjeve dhe bankave tregtare përpara hyrjes në fuqi të këtij vendimi. Kështu, sipas VKM-së në fjalë, bizneset që aplikojnë nuk duhet të kenë kredi me probleme, ndërsa Ministria e Financave, merr përsipër që krahas garantimit të principalit, të rimbursojë interesat e huave që do të trajtohen nën këtë marrëveshje garancie. Rimbursimi i bankave për interesat që burojnë nga huatë e garantuara nga kjo marrëveshje garancie do të bëhet një herë në tre muaj, ku tremujori i parë do të fillojë të përllogaritet nga data e bërjes efektive të kësaj Marrëveshjeje.
Në vendim përcaktohet gjithashtu se nuk do të gjenerohen dhe nuk do të rimbursohen interesa për më shumë se 30 ditë pa pagesë principali nga data që i ka lindur detyrimi huamarrësit për të paguar principalin sipas marrëveshjes së huasë. Ndërkaq, bankat tregtare çdo 90 ditë nga data e nënshkrimit të kësaj marrëveshjeje do të dërgojë pranë Ministrisë së Financave kërkesën për rimbursimin e interesave në formë elektronike dhe të shkruar, me informacion të detajuar në lidhje me interesat e gjeneruara dhe mënyrën e përllogaritjes së tyre, për secilën kredi të akorduar për këtë qëllim. Pas verefikimeve të bëra, Ministria autorizon transfertën e pagesës ose pagesave për huadhënësin brenda 15 ditëve pune nga data e marrjes së kërkesës për rimbursim.
Sa i takon normave të interesit, specifikohet që bankat tregtare do të ofrojnë huanë me një normë interesi preferenciale, të barabartë me normën mesatare të interesit të tre ankandeve të fundit të bonove të thesarit 12 mujore plus një marzh prej 0.5%, por në asnjë rast norma e interesit nuk do të jetë më e lartë se 2.85% dhe ajo të qëndrojë e pandryshuar deri në përfundimin e afatit të Huasë. Po ashtu bankat nuk do të aplikojë tarifa, komisione, penalitete, kamatëvonesa apo çfarëdolloj mase tjetër që mund të krijojë kosto për bizneset dhe qeverinë.
Elisabeta Dosku / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.