Gati një vit pas krizës monetare, turqit e papunë ende “nuk mund të ëndërrojnë”
Shkalla e papunësisë në Turqi ka shënuar gati nivelet më të larta të regjistruara ndonjëherë. Ekonomia ra në recesion vitin e kaluar, pjesërisht për shkak të shumë viteve investimesh për projekte të mëdha ndërtimi të financuara me çmim të lirë nga kredia e huaj, të cilat ishin të vështirë për t’u përballuar pas rënies së lira turke. Kjo përfshin aeroportin e ri të Stambollit, të cilin qeveria thotë se është ndër më të mëdhenjtë në botë sa i përket kapacitetit.
Shumë ekonomistë presin që ekonomia e Turqisë, e cila ka parë një dekadë rritjeje të fortë, të tkurret në 2019 duke sjellë papunësi të lartë dhe të gjatë, çka mund të dëmtojë produktivitetin dhe perspektivat afatgjata të rritjes për ekonominë më të madhe të Lindjes së Mesme. Çrregullimi në rritje midis votuesve kundrejt menaxhimit ekonomik të presidentit Tayyip Erdogan ka sjellë disa pengesa dhe pasoja për Partinë e tij AK në qytetet më të mëdha të vendit, duke përfshirë edhe humbjen e madhe në zgjedhjet për krye bashkiak të Stambollit të dielën e kaluar.
Numri i të papunëve në Turqi ka arritur shifrën e më shumë se 4.5 milionë e gjysmë, me një shkallë zyrtare të papunësisë prej 14.7% në shkurt, përpara uljes në 14.1% në muajin mars. Kjo e vendos shkallën e papunësisë të Turqisë afër asaj të Spanjës, e cila ka normën e dytë më të lartë të Bashkimit Europian pas Greqisë.
Të martën, Erdogan vuri në dukje se të dhënat e punësimit kishin filluar të përmirësoheshin. “Ne po bëjmë përpjekje për të gjetur ekuilibrin në ekonomi, për të hequr paqëndrueshmërinë në kurset e këmbimit dhe për të rritur vendet e punës. Treguesit që nga qershori tregojnë zhvillime pozitive,” tha presidenti gjatë një fjalimi në Ankara për ligjvënësit në Partinë e tij AK. Qeveria në prill njoftoi një varg masash strukturore që synonin nxitjen e ekonomisë përveç hapave të veçanta për të rritur punësimin, përfshirë futjen e stimujve për kompanitë që të punësojnë staf shtesë dhe mbështetje për punëdhënësit që kanë të bëjnë me një rritje prej 26% të pagës minimale këtë vit. Ai është i bindur se ekonomia do të rritet gjatë pjesë së mbetur të vitit, kur parashikohet që papunësia të bjerë në rreth 12%.
Por shumë ekonomistë nuk janë aq optimistë. Ndërsa Ankaraja thotë se pret një rritje ekonomike prej 3.5% vitin e ardhshëm, Organizata për Bashkëpunim Ekonomik dhe Zhvillim parashikon rritje prej 1.6%. Seyfettin Gursel, drejtor i qendrës kërkimore të Betam në Universitetin Bahcesehir të Stambollit, i cili fokusohet në papunësinë, thotë se pret që të papunët do të mbeten në këtë situatë për një periudhë të gjatë kohore ose deri në rreth 18 muaj. “Tani njerëzit do të jenë të papunë për një kohë shumë të gjatë, ” tha Gursel. “Që nga marsi, të dhënat zyrtare treguan se rreth 21% e turqve të papunë kishin rreth një vit apo më shumë në kërkim të një vendi pune.”
Burimi: Reuters
Edel Strazimiri / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.