Gati zgjatja e mandateve të Vettingut – Bushka: Morëm miratimin e të gjithë aktorëve, shtyrja opsioni më i mirë dhe më i shpejtë
Mbledhja e Përbashkët e Këshillit të Legjislacionit dhe Komisionit Parlamentar të Ligjeve ka miratuar shtyrjen deri në fund të vitit 2024 mandatin e komisioneve të Vetting-ut. Vendimi, sipas Kreut të Komisionit Parlamentar të Ligjeve Klotilda Bushka ka ardhur pas konsultimit, me të gjithë aktorët e përfshirë në reformën në Drejtësi. Ajo solli në vëmendje se janë marrë në konsideratë opinioni i Komisionit të Venecias, KLP, KLGJ, SPAK, shoqërisë civile, botës akademike, si dhe ekspertëve vendas e të huaj.
Në bazë të argumenteve të mazhorancës, që e ka propozuar zyrtarisht këtë nismë, qëndron fakti që Komisionet e Vetting-ut nisën me vonesë punën, ndërkohë që Pandemia Covid 19 gjithashtu uli ritmin e procesit të Vetting-ut. Ndërsa mandate i dy prej organeve të Vetting-ut përfundon në verën e këtij viti, nuk janë kaluar ende në sitë rreth 30% e gjyqtarëve e prokurorëve.
Megjithatë do të jetë Kuvendi ai që do të thotë fjalën përfundimtare për këtë ndryshim Kushtetues, i cili kërkon votim me shumicë të cilësuar.
Lorenc Rabeta / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.