Gazifikimi, MEI: Kostot për TEC Vlorën, Fier-Ballsh dhe Tiranë-Durrës

Gazifikimi po shihet gjithnjë e më shumë si një prioritet në kushtet kur edhe konkretizimi i TAP është çdo ditë e më afër. Por qeveria ka identifikuar tre projektet e para më afatshkurtra në realizim krahasuar me objektivat  finalë të masterplanit.

“Masterplani i gazit është një dokument strategjik i përgjithshëm për gjithë territorin e vendit tonë. Ndërsa për këtë arsye janë parashikuar edhe tre projekte afatshkurtra, të cilat do të detajohen në nivel parafizibiliteti, pra do të jenë projekte të gatshme për investime nga investitorë të huaj, të cilët synojnë të hynë në tregun shqiptar të gazit natyror“, u shpreh Dritan Spahiu, drejtor i Politikave dhe Zhvillimit të Hidrokarbureve pranë Ministrisë së Energjisë dhe Infrastrukturës.

“Projekti i parë do të jetë ai nga dalja e projektit TAP drejt TEC-it të Vlorës, pra Fier-Vlorë me kosto rreth 15 milionë euro. Projekti i dytë i cili është analizuar në nivel parafizibiliteti është ai Fier-Ballsh për ndërtimin e rrjetit të transmetimit dhe ka një kosto rreth 11 milionë euro. Projekti i tretë është ai i rajonit Tiranë-Durrës, i cili vlerësohet të ketë konsumin më të madh për sa u përket klientëve rezidencial apo klientëve të mëdhenj”, vijoi Spahiu.

Prezantimi i tre projekteve prioritare u bë gjatë një tryeze të mbajtur nga Ministria e Energjisë dhe Industrisë. Procesi i identifikimit u mbështet  paraprakisht nëpërmjet Kuadrit të Investimeve të Ballkanit Perëndimor të Bashkimit Europian.

Vlera e përgjithshme e investimit në rrjetin  e transmetimit të Shqipërisë do të jetë 185 milionë euro kurse gjatësia e përgjithshme 625 kilometra. Nga këto rreth 87 milionë euro dhe 168 kilometra i përkasin IAP.

Nertila Maho/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.