Gazsjellësi greko-bullgar – Kontrata me BEI pritet të nënshkruhet në fillim të dhjetorit
Kontrata me Bankën Europiane të Investimeve për të financuar interkonjektorin greko-bullgar mund të nënshkruhet në fillim të muajit dhjetor. Deklarata ka ardhur nga ministrja e Energjisë bullgare, Temenuzhka Petkova, gjatë një diskutimi mbi sigurinë e energjisë në Europën Juglindore.
Ndërsa e cilësoi këtë të fundit si një faktor shumë të rëndësishëm për sigurinë kombëtare dhe ekonominë, Petkova shtoi se ky gazsjellës është një projekt kyç për rajonin e Ballkanit.
“Deri më sot, projekti është në fazën e tij vendimtare me përfundimin e prokurimit publik. Një arritje shumë e rëndësishme për të siguruar një përjashtim nga rregullat e qasjes është tejkaluar. Tani po punojmë për nënshkrimin e marrëveshjes së financimit me Bankën Evropiane të Investimeve dhe shpresoj se do të jetë një fakt në fillim të dhjetorit “, tha ministrja, duke vënë në dukje se garancia shtetërore për këtë projekt ishte 110 milionë euro.
Ndërkohë, shtoi më tej se po punohet për një marrëveshje ndërqeveritare midis Greqisë dhe Bullgarisë për të siguruar qëndrueshmërinë e projektit në të ardhmen.
Vetëm pak ditë më parë Komisioni Europian aprovoi projektin, pasi e konsideroi atë në përputhje me rregullat e Bashkimit Europian.
G.D/SCAN
Intekonjektori Greqi-Bullgari – KE jep aprovimin: Në përputhje me rregullat e BE-së
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.