Genc Pollo për “60 Minuta”: Shembjen e Teatrit e përjetova me keqardhje, kam shumë kujtime. Kejdi Mehmetaj: Prishja e Teatrit një çmenduri!

Në studion e emisionit më të ri të RTV SCAN, ’60 minuta’, dedikuar temave aktuale të politikës shqiptare, ishin të ftuar Genc Pollo, për të përfaqësuar zërin e PD, Kejdi Mehmetaj, nga LSI, Ledio Braho, jurist, dhe Fatmira Nikolli, gazetare kulture dhe aktiviste e Aleancës për Mbrojtjen e Teatrit.

Z.Pollo është shprehur lidhur me shembjen e Teatrit se ai e ka përjetuar me keqardhje për shkak të eksperiencave të para që ai ka pasur tek ajo godinë. I pyetur mbi arsyen pse Z.Pollo mendon që u gjet ajo mënyrë për rrëzimin e godinës, ai ka thënë se nuk mundet të thotë gjë, veçse të kërkojë tek Kryeministri Rama arsyet e asaj shembje.

Znj. Mehmetaj ka ritheksuar edhe njëherë pandershmërinë e shembjes së Teatrit Kombëtar, duke nënvizuar se kauza nuk është vetëm politike, por është një kauzë qytetare që lidhet me identitetin e Shqipërisë.  Më tej, Znj. Mehmeti shtoi gjithashtu se zgjidhja më e mirë për funksionalitetin e asaj godine, do ishte që ajo të kthehej në muze, e Teatri i Ri Kombëtar të ishte bërë në një hapësirë tjetër. “Çuarja e gjithë atyre policëve, në atë orë, është një çmenduri e përgatitur për të ngjallur frikë.”, ka thënë Znj.Mehmetaj.

Znj.Nikolli, gazetare kulture dhe aktivistja e Aleancës për Mbrotjen e Teatrit, ka përshkruar me detaje frikën që ajo ka ndjerë përgjatë shembës së godinës së Teatrit Kombëtar. Ajo ka shprehur më tej vështirësitë e gazetarëve dhe operatorëve për të regjistruar ndodhinë dhe frikën e vazhdueshme mos brenda godinës kishte ende njerëz. Fatmira Nikolli gjithashtu ka bërë krahasimin mes TK dhe TOB, duke thënë se edhe TOB ishte në një gjende mjerane, por gjithsesi nuk u shemb, u rikonstruktua.

Juristi Braho, në aspektin juridik, është shprehur se procedurat që çuan në shembjen e godinës së Teatrit janë të paligjshme. Lidhur me dërgimin e çështjes në Gjykatës Kushtetues, Braho ka thënë se ky ishte vendimi i duhur, për sa kohë që çështja kishte probleme me anti-kushtetueshmërinë, e si rrjedhojë çështja nuk mund të shkonte në Gjykatën Administrative. “Fillimisht ka thënë ai, vendimmarrja duhet të ishte nga Këshilli Kombëtar i Territorit, jo nga Këshilli Bashkiak. Por edhe vendimi i Këshillit Bashkiak, ka qenë jo transparent, e mbi të gjitha veprimi është kryer pasi të shpallej vendimi.” – është shprehur Braho lidhur me paligjshmëritë e vendimit.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.