Gjelbërimi i Bulevardit të Ri – Veliaj: Mbjellim 1100 pemë, segmenti i parë gati në pranverë

Rreth 1100 pemë të llojeve të ndryshme do të mbillen në 800 metrat e para të Bulevardit të Ri të Tiranës, pas vendosjes së pllakave, ndërsa paralelisht po punohet shpejt edhe për ndërtimin e parkingun nëntokësor. Kryebashkiaku, Erion Veliaj, ishte i pranishëm gjatë procesit të mbjelljes së pemëve të para, ku bëri me dije se segmenti i parë i këtij projekti do të përfundojë në pranverë.

“Në pranverë qytetarët do të kenë mundësi të shohin përtej perdes së metalit që na ndan nga kryqëzimi i ish Stacionit të Trenit. Ky investim është një vlerë e shtuar jo vetëm qytetarët e Tiranës, por për të gjithë Shqipërinë, sepse qyteti do të ofrojë një lagje të re, moderne, me një hapësirë të theksuar komerciale dhe me transport, i cili respekton, si në asnjë projekt tjetër të Tiranës, larminë midis transportit publik, atyre që përdorin biçikletat, këmbësorëve dhe makinave private. Qytetarët do të kenë pa fund sheshe, po ashtu edhe Parkun Qendror”, u shpreh Veliaj.

Kryebashkiaku i Tiranës u bëri thirrje bizneseve që të shfrytëzojnë mundësinë për të investuar në këtë zonë, e cila me Bulevardin e Ri dhe Parkun Qendror do të jetë një nga qendrat e reja të zhvillimit të kryeqytetit, duke i dhënë një vlerë shumë të madhe pronës aty.

Projekti i gjelbërimit të Bulevardit të Ri parashikon mbjelljen e 1100 pemëve me 18 lloje të ndryshme, të cilat çelin në stinë të ndryshme. Lartësia e pemëve shkon nga 4 deri në 7 metra.

Elisabeta Dosku/RTV SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.