Gjenden prova të një vrime të zezë solitare në Rrugën e Qumështit!

Nëse, siç janë të bindur astronomët, vdekja e yjeve të mëdhenj lë pas vrima të zeza, atëherë duhet të ketë qindra miliona vrima të zeza të shpërndara në të gjithë Rrugën e Qumështit. Problemi është se vrimat e zeza të izoluara janë të padukshme dhe për këtë arsye shumë të vështira për t’u zbuluar.

Tani një grup astronomësh të udhëhequr nga Universiteti i Kalifornisë, Berkeley, kanë zbuluar për herë të parë se çfarë mund të jetë një vrimë e zezë e solitare dhe e ka bërë këtë duke vëzhguar dritën e një ylli që ndodhet pas një objekti të padukshëm: drita u shtrembërua nga fusha e fortë gravitacionale e objektit në fjalë dhe u devijua në drejtim të teleskopit Hubble përmes fenomenit të quajtur mikrolensimi gravitacional.

Ekipi hulumtues, i udhëhequr nga Casey Lam dhe Jessica Lu, vlerëson se masa e objektit të padukshëm është midis 1.6 dhe 4.4 herë më shumë se ajo e Diellit.Kjo pasiguri ka bërë që studiues të tjerë të besojnë se objekti në fjalë mund të jetë gjithashtu një yll neutron. Kjo hipotezë alternative është avancuar sepse masa e një vrime të zezë që rrjedh nga një yll i vdekur duhet të jetë të paktën 2.2 herë më shumë se masa e diellit. Yjet neutron janë gjithashtu objekte të dendura dhe shumë kompakte, praktikisht të padukshme nga Toka në raste të vetme, në të cilat presioni i brendshëm i neutroneve pengon krijimin e një vrime të zezë. Një grup tjetër kërkimor nga Instituti i Shkencës së Teleskopit Hapësinor në Baltimore iu bashkua kërkimit dhe analizoi të dhënat nga Lam dhe Lu. Në këtë rast, rezultati tregon se masa e objektit të padukshëm që krijon mikrothjerrëzën është 7.1 masa diellore dhe kjo do të nënkuptonte se padiskutim jemi përballë një vrime të zezë.

Sido që të jetë, pavarësisht nëse është një vrimë e zezë apo një yll neutron, objekti është ai që mbetet nga një yll që tani është një “fantazmë” dhe endet i vetëm në galaktikën tonë. Përcaktimi se sa objekte të tilla popullojnë galaktikën tonë, Rruga e Qumështit, do t’i ndihmojë astronomët të kuptojnë më mirë evolucionin e yjeve, veçanërisht se si vdesin. Dhe ndoshta do të zbulojë nëse ndonjë nga vrimat e zeza të padukshme është një vrimë e zezë primordiale, një që disa kozmologë spekulojnë se është prodhuar në sasi të mëdha menjëherë pas Big Bengut.

Hulumtimi i botuar në The Astrophysical Journal Letters paraqet gjithashtu katër shembuj të tjerë të mikrolensimit që nuk shkaktohet nga një vrimë e zezë, por nga nanot e bardhë dhe sigurisht nga një yll neutron.

Nëse objekti i zbuluar vërtetohet se është me të vërtetë një vrimë e zezë, është e mundur që, statistikisht, të ketë rreth 200 milionë objekte të ngjashme në galaktikën tonë, ashtu siç do të donin studimet teorike. Analizat e reja të këtij objekti janë planifikuar për vjeshtën e vitit 2022 dhe autorët janë të sigurt që do të përcaktojnë me saktësi të jashtëzakonshme karakteristikat e objektit në fjalë. FCS

Edel Strazimiri / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.