Gjendja e Digave të Liqenit të Bovillës dhe atij Artificial – UKT, studim për valën goditëse në rast katastrofe
Situata aktuale jo e mirë e Digës së Liqenit Artificial dhe rrezikshmëria e lartë e asaj të Liqenit të Bovillës ka detyruar shoqërinë Ujësjellës Kanalizime Tiranë të kërkojë një studim për përcaktimin e përhapjes së valës në këto dy liqene.
Konkretisht, kërkohet një analizë e valës goditëse në rastin kur ndodh prishja e mundshme e digave, si edhe hartimi i skemës së alarmit të evakuimit për zonat që do përmbyten nga kjo valë.
Shkatërrimi i digës së Bovillës, theksohet në raportin e UKT, do të rezultonte në vërshimin e sasive të mëdha të ujit në biefin e poshtëm të saj, duke rrezikuar jetët e njerëzve dhe pronat e tyre që gjenden në këto zona.
Kjo digë i nisi punimet në vitet 1989-1991, dhe i vazhdoi në vitin 1994 pas ndërprerjeve për shkak të ndryshimeve politike.
Ndërsa diga e Liqenit Artificial është ndër digat e para të ndërtuara në vend, në vitet 1957-1958, me veçantinë se për ndërtimin është përdorur forca e krahut, prej përdorimit të kufizuar të makinerive.
Sot kurora e kësaj dige ka pësuar plasaritje të asfaltit të rrugës, ndërsa skarpata e bjefit të sipërm duket se ka lëvizje. Shqetësimi për gjendjen e digës dhe pasojat që shoqërojnë një prishje të mundshme të saj këto kohët e fundit është rritur, veçanërisht pas përmbytjes së vitit 2004.
UKT ka hapur të enjten garën me një fond limit prej 3.5 milionë lekësh për këtë studim, garë e cila do të mbetet e hapur për oferta deri më 15 Shtator. Ndërsa fituesi do të ketë një afat 30-ditor për të realizuar studimin.
“Synimi kryesor i këtij projekti është për të parashikuar jetëgjatësinë dhe rritur atë me anë të masave konkrete, si dhe sigurinë e këtyre digave, por gjithashtu edhe për të rritur shkallën e cilësisë së shfrytëzimit”, përfundon raporti i UKT.
Gjithsesi, studimi do të shërbejë më së shumti për krijimin e planeve të evakuimit për një të ardhme të largët, pasi digat pavarësisht se ndërtohen për një jetëgjatësi të madhe, nuk janë struktura të konsideruara të pashkatërrueshme.
Angelo Haruni/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.