Gjermanët i “mbërthen” optimizmi – Konsumatorët me moralin më të lartë që prej vitit 2001
Morali i konsumatorëve gjermanë ka prekur nivelin më të lartë në 16 vite, tregojnë të dhënat e fundit. Indikatori i ndjeshmërisë konsumatore u rrit në 10.4 pikë, që është niveli më i lartë që prej Tetorit të vitit 2001.
Të dhënat rezultojnë gjithashtu mbi pritshmëritë e tregjeve dhe analistëve, si dhe sinjalizojnë se, konsumi privat do të vijojë të jetë lokomotiva e rritjes së ekonomisë numër një të Europës.
Pavarësisht rreziqeve globale, si politikat proteksioniste të administratës së re amerikane apo negociatat e vështira të Brexit, konsumatorët gjermanë besojnë më shumë se asnjëherë më parë gjatë një dekade e gjysmë se, ekonomia e vendit do të rritet.
Pritshmëritë e konsumatorëve janë rritur edhe duke marrë shtysë nga përmirësimi i shifrave dhe projeksioneve makroekonomike. Tregu i fortë i punës në Gjermani, me papunësinë pranë nivelit rekord minimal po ushqen gjithashtu këto pritshmëri. Indeksi i ndjeshmërisë konsumatore është i fundit në serinë e atyre të dhënave që tregojnë se, ekonomia gjermane po ecën me kapacitet të plotë.
Vetëm një ditë më parë, indeksi i klimës së biznesit tregonte për nivelin më të lartë në histori.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.