Gjermania, 4 muaj për të ndërprerë qymyrin rus – BE në kërkim të tregjeve alternative. Gjermania paketë për refugjatët Ukrainas
Gjermanisë i duhet një periudhë 4-mujore për të zbatuar ndërprerjen e furnizimeve me qymyr rus pas sanksioneve të vendosura nga Bashkimi Europian, deklaron Kancelari Olaf Scholz
Vendet e Bashkimit Europian u dakordësuan për një paketë të pestë sanksionesh kundër Rusisë, duke përfshirë një ndërprerje të eksporteve ruse të qymyrit dhe një mbyllje të porteve për anijet ruse.
Scholz u shpreh se sanksionet janë një hap i madh dhe vendimtar, duke shtuar se nëpërmjet sanksioneve, presidenti rus Vladimir Putin po shkatërron të ardhmen e vendit të tij me pushtimin e Ukrainës.
Paketa përfshin një periudhë prej 120 ditësh për t’u dhënë kohë vendeve anëtare të Bashkimit Europian për të gjetur furnizues alternativë.
Ministria Gjermane e Ekonomisë nëpërmjet një raporti të përgatitur për parlamentin, paralajmëroi në fillim të javës se vendi ka të ngjarë të mbyllë disa nga termocentralet e tij nëse i jep fund importeve të qymyrit rus menjëherë.
Scholz njoftoi gjithashtu se qeveria gjermane do t’i japë 2 miliardë euro (2.2 miliardë dollarë) shteteve federale për të mbuluar koston e kujdesit dhe integrimit të refugjatëve ukrainas në Gjermani.
Kryebashkiaku i Berlinit Franziska Giffey duke iu referuar krizës së emigrantëve të vitit 2015, e cila pothuajse rrëzoi qeverinë Merkel, u shpreh se, Gjermania po e bën më mirë, më ndryshe dhe ka mësuar nga gabimet e të shkuarës, përsa i përket akomodimit dhe integrimit të refugjatëve.
Gjermania ka regjistruar rreth 316,000 refugjatë nga Ukraina, sipas policisë federale. Berlini vlerëson se deri në 60,000 prej refugjatëve janë aktualisht duke banuar në kryeqytetin gjerman.
Blerta Lata / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.