Gjermania afrohet me Kinën – Kompanitë ikonë gjermane arrijnë marrëveshje sipër 20 mld dollarëve
Kancelarja gjermane Angela Merkel dhe kryeministri kinez Li Keqiang, theksuan se do të angazhohen për një sistem tregtar shumëpalësh, pas vendosjes së tarifave nga Washingtoni. Në një fjalim në Berlin pasi të dy vendet nënshkruan marrëveshje me vlerë sipër 20 miliardë eurove, Li tha se këto projekte demonstrojnë se si vendet mund të bashkëpunojnë. Përveç projekteve mes agjencive qeveritare, kompani si BASF, BMW, Volkswagen, Daimler, Siemens dhe Bosch , lajmëruan dakordësi dhe partneritete.
“Tregtia e lirë luan një rol vendimtar për të dyja palët dhe për ekonominë botërore”, tha kryeministri kinez. Ditën e Premte, presidenti i Shteteve të Bashkuara, Donald Trump, vendosi tarifa prej 25% ndaj 34 miliardë dollarë mallra kineze, duke akuzuar Pekinin se vendos presion te kompanitë e huaja për t’i transferuar teknologjinë. Kina ndërkohë, është kundërpërgjigjur duke shënjestruar një listë të mallrave amerikanë.
Përveç seleksionimit të mallrave kinezë, Trump ka vendosur tarifa në importet e çelikut dhe aluminit, që përfshijnë edhe Bashkimin Europian, e ka kërcënuar tarifa shtesë për makinat, kryesisht ato gjermane. Prodhuesi bavarez, BMW, është prekur nga lufta tregtare mes Kinës dhe SHBA dhe lajmëroi këtë të Hënë se do të duhet të rrisë çmimet për modelet SUV që ndërton në Amerikë dhe eksporton në Kinë. Kjo e fundit vjen pasi Pekini ka rritur taksat në importe për makinat nga Shtetet e Bashkuara në 40% nga 15%.
“Ne kemi shumë investime direkte në SHBA dhe në Kinë. Është e rëndësishme që të respektojmë rregullat e tregtisë”, tha Merkel. Ajo mirëpriti gjithashtu vendimin e Kinës për të lehtësuar rregullat për investimet e huaja, duke shtuar se është e rëndësishme që të shohësh hapjen e tregut kinez. Ndër marrëveshjet e arritura, firma kineze CATL lajmëroi se do të ndërtojë një fabrikë në Gjermani, për të furnizuar BMW me bateri për makina elektrike.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.