Gjermania bën thirrje për tregtinë – “Europa nuk do t’i dorëzohet kërcënimeve nga SHBA”

Europa nuk do ti përulet kërcënimeve të Shteteve të Bashkuara mbi tregtinë dhe kërkon të gjejë një zgjidhje nëpërmjet negociatave,  sipas ministrit të jashtëm të Gjermanisë, Heiko Maas.  Komentet e tij vijnë përpara se Komisioni Europian të bisedojë me Washingtonin mbi çështjet e lidhura me tregtinë. Presidenti i Komisionit, Jean-Claude Juncker, pritet të takojë presidentin amerikan Donald Trump këtë javë, për të diskutuar mbi tarifat amerikane ndaj çelikut dhe aluminit europian si dhe për kërcënimet e tij mbi makinat që prodhohen në Bashkimin Europian.

“Europa duhet të qëndrojë e bashkuar. Shpresoj që do të arrijmë në një zgjidhje nëpërmjet konsensusit dhe jo me kërcënime”, tha ministri gjerman.  Trump ka kritikuar prej kohësh tarifat e larta të Bashkimit Europian për importet e makinave dhe e ka përshkruar bllokun si një “armik” tregtar. Sipas zyrtarëve të Bashkimit Europian, ndërkohë që tarifat për importet e makinave janë më të mëdha se ato që aplikohen në SHBA,  barrierat amerikane për produkte të tjera si kamionët, janë më të larta.

Bashkimi Europian ka bërë të ditur se ulja e tarifave për makinat, mund të jetë pjesë e një marrëveshjeje tregtare më të gjerë.  Heiko Maas, që pritet të vizitojë Japoninë dhe Korenë e Jugut, vende që janë kërcënuar gjithashtu nga tarifat amerikane, tha se askush nuk ka interes të vendosë barriera tregtare. “Në fund, të gjitha palët do të humbasin, përfshirë Amerikën”, tha ai.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.