Gjermania do të mbajë vrullin – Ministria e Financave tregon për një rifuqizim në tremujorin e tretë
Ekonomia gjermane është dobësuar në nisje të tremujorit të tretë, pas performancës së fortë në gjysmën e parë të vitit, megjithatë treguesit ekonomik sinjalizojnë për një rifuqizim në pjesën tjetër të vitit, raporton Ministria e Financave.
Ekonomia më e madhe e Europës ndodhet në një rimëkëmbje të nxitur nga konsumi, numri rekord i punësimit, rritja e pagave reale dhe kostot e ulëta të huamarrjes, disa kushte që ka gjasa të mbështesin kancelaren Angela Merkel për të fituar mandatin e saj të katërt në zgjedhjet federale që zhvillohen këtë të diel.
Ministria e Financave, e udhëhequr nga konservatorët e Merkel dhe veterani Wolfgang Schaeulbe, bëri të ditur në raportin mujor se ekonomia ka humbur vrull në nisje të tremujorit të tretë. Megjithatë, ndërsa ndjesia e bizneseve qëndron pozitive dhe eksportuesit gjermanë pritet të përfitojnë nga një rimëkëmbje globale, ekonomia ka gjasa të përshpejtohet në pjesën e mbetur të vitit.
Ekonomia gjermane u rrit me 0.7% në tremujorin e parë dhe me 0.6% në të dytin, prej rritjes së shpenzimeve konsumatore dhe shtetërore si dhe investimeve më të mëdha në ndërtesa dhe makineri. Ministria deklaroi se kushtet makroekonomike janë pozitive dhe kërkesa e brendshme do të vazhdojë të nxisë ekonominë.
Aktiviteti i fortë ekonomik ka nxitur edhe të ardhurat nga taksat. Nga Janari në muajin Gusht, të ardhurat nga taksat e qeverisë Federale u rritën me 4.1% me bazë vjetore, sipër projeksioneve prej 3.9%, raportoi ministria. Rritja e të ardhurave ka ndihmuar qeverinë e Angela Merkel për të shpenzuar më shumë në infrastrukturë, strehimin dhe integrimin e refugjatëve, pa marrë borxh të ri.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.