Gjermania nuk zhgënjen – Industria në “formë”, do shtyjë ekonominë në 0.7% rritje në T2
Prodhimi industrial në Gjermani u rrit mbi pritshmëritë gjatë muajit Maj, tregojnë të dhënat e fundit që i japin shtysë pritshmërive se fabrikat do të mbështesin rritjen e ekonomisë më të madhe të Europës gjatë tremujorit të dytë të vitit.
Prodhimi industrial u rrit kështu me 1.2% në terma mujorë, thotë Ministria e Ekonomisë.
Muaji Maj është i pesti me radhë në rritje sa i përket këtij sektori. Të dhënat rezultojnë gjithashtu mbi pritshmëritë e tregjeve dhe analistëve.
Performanca pozitive merr shtysë kryesisht falë rritjes së prodhimit energjetik. Ministria e Ekonomisë ndër të tjera ka rishikuar në territor negativ shifrën e muajit Prill, në 0.7% rritje, nga 0.8% që vlerësohej paraprakisht.
Të dhënat e publikuara më herët gjatë javës flisnin për një kërkesë të fortë nga jashtë që ka nxitur prodhimin gjatë Majit.
Të gjithë indikatorët sinjalizojnë një rritje të ekonomisë gjermane me 0.7% gjatë tremujorit të dytë të vitit. Ministria e ekonomisë pret që sektori industrial të vijojë të fitojë vrull.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.