Gjermania rrit pagat. Marrëveshje me sindikatat, rritja 4.35% në sektorin publik
Qeveria gjermane dhe sindikatat arritën më në fund, marrëveshjen për rritjen e pagave në sektorin publik. Në bazë të kësaj marrëveshje, pagat e rreth 2 milionë nëpunësve civilë do të rriten me 4.35%, nëpërmjet dy fazave të ndryshme.
Rritja është bindshëm më e vogël se ajo që u kërkua. Por, pavarësisht kësaj, diçka e tillë pritet të nxisë së tepërmi konsumin privat, në një kohë që pikërisht konsumi ka zëvendësuar eksportet si lokomotiva e rritjes së ekonomisë më të madhe të Europës.
Sindikatat njoftuan se, gjatë këtij viti, rritja e pagave do të jetë prej vetëm 2%, duke filluar prej 1 Janarit të këtij viti, me efekt retroaktiv, ndërkohë që, prej 1 Janarit të vitit 2018, do të hyjë në fuqi rritja tjetër, prej 2.35%. Qeveria federale vlerëson se, marrëveshja do ti kushtojë financave të shtetit, 870 milionë euro këtë vit dhe 1.9 miliardë euro vitin e ardhshëm.
Grupi kryesor sindikalist në vend kishte kërkuar një rritje pagash prej 6%, me një fazë të vetme, pra brenda këtij viti. Gjithsesi, sindikatat e kanë vlerësuar si zhvillim pozitiv arritjen e marrëveshjes, duke u shprehur të kënaqura.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.