Gjermania shtrëngon masat kundër përhapjes së Covid-19!
Gjermania do të prezantojë masa të reja për të frenuar përhapjen e COVID-19 para natës së Vitit të Ri, duke përfshirë kufizimin e tubimeve private për personat e vaksinuar në një maksimum prej 10 personash, tha kancelari Olaf Scholz.
Duke u ndalur shumë larg një bllokimi mbarëkombëtar, Scholz gjithashtu ra dakord me kryeministrat e 16 shteteve të Gjermanisë për të mbyllur klubet dhe diskotekat dhe për të lejuar vetëm ngjarje të mëdha, përfshirë ndeshjet e futbollit, pa spektatorë.
Gjermania gjithashtu do të shtojë fushatën e saj të vaksinimit përforcues. Rreth 70.4% e popullsisë së Gjermanisë prej rreth 83 milionë banorësh janë vaksinuar plotësisht dhe 32.6% kanë marrë një injeksion përforcues.
Instituti Robert Koch (RKI) për sëmundjet infektive kishte rekomanduar masa më të rrepta, duke përfshirë futjen e menjëhershme të “kufizimeve maksimale të kontaktit” dhe kufizimin e udhëtimit në atë që ishte absolutisht e nevojshme.
Qyteti i Hamburgut ka vendosur kufizime duke filluar nga 24 dhjetori. Restorantet dhe baret duhet të mbyllen deri në orën 23:00. Ora policore do të jetë ora 1 e mëngjesit për natën e ndërrimit të viteve.
RKI raportoi 23,428 infeksione të reja të martën, dhe 462 vdekje, duke e çuar totalin e Gjermanisë në 108,814. Shkalla e incidencës shtatë-ditore – numri i njerëzve për 100,000 të infektuar gjatë javës së kaluar – ra në 306.4 nga 316 një ditë më parë.
Ekspertët kanë paralajmëruar gjithashtu se varianti Omicron mund të shkaktojë ndërprerje në shërbimet e urgjencës, si dhe në furnizimin me energji elektrike dhe ujë. Spitalet mund të përballen me një valë të dyfishtë të pacientëve të sëmurë rëndë dhe mungesa masive të stafit për shkak të infeksioneve të reja midis mjekëve dhe infermierëve.
Scholz do të takohet sërish me kryeministrat e shtetit më 7 janar për të diskutuar situatën e COVID-19.
Edel Strazimiri / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.