Gjermania s`ka rivalë – Ekonomia nuk di të ndalet, rritet prodhimi dhe eksportet
Prodhimi industrial në Gjermani u rrit ndjeshëm gjatë shkurtit, duke thyer çdo parashikim. Ekonomia më e madhe e Europës duket se tashmë po operon me kapacitet të plotë. Prodhimi në sektor u rrit me 2.2% gjatë muajit.
Diçka të tillë, vetë ministria gjermane e ekonomisë e ka cilësuar si një gjë të jashtëzakonshme sa i përket të dhënave të tremujorit të parë të vitit. Projeksionet e tregjeve dhe analistëve ndërkohë flisnin për një rënie të prodhimit me 0.1% gjatë shkurtit. Eksportet nga ana tjetër u rritën me 0.8% gjatë së njëjtës periudhë kohore, ndërkohë që importet ranë me 1.6%.
Edhe këtu pritshmëritë kanë dështuar, sidomos sa i përket eksporteve ku projektohej një rënie. Të dhënat sinjalizojnë një rritje të suficitit tregtar të Gjermanisë, duke e vendosur në pozita edhe më pak të favorshme sa i përket akuzave për një garë tregtare jo të ndershme.
Suficiti tregtar u ngjit kështu gjatë shkurtit në 21 miliardë euro, nga 18.9 miliardë që ishte gjatë muajit të parë të vitit. Të dhënat janë të fundit në serinë e atyre që tregojnë se ekonomia gjermane është më në formë se kurrë më parë, dhe se në Europë, e jo vetëm, nuk ka rivalë.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.