Gjermania, Zvicra dhe Austria planifikojnë përfundimin e shumicës së kufizimeve të Covid në mars!
Udhëheqësit e Gjermanisë njoftuan të mërkurën planet për t’i dhënë fund shumicës së kufizimeve të vendit deri më 20 mars, një vendim që përkoi me lëvizjet e Austrisë dhe Zvicrës fqinje për të hequr shumë nga kufizimet e tyre më shpejt. Një plan me tre hapa u miratua nga kancelari Olaf Scholz dhe 16 guvernatorët e shteteve të vendit pasi shifrat zyrtare tregojnë se shkalla e infeksionit me COVID-19 në Gjermani ka filluar të regjistrojnë rënie. Scholz tha se kulmi ndoshta është arritur tani.
Lehtësimi do të fillojë me heqjen e rregullave që pengonin njerëzit pa prova vaksinimi ose rikuperimi të vizitonin dyqanet jo thelbësore dhe heqjen e limiteve në tubimet private të personave të vaksinuar. Duke filluar nga 4 marsi, kërkesat për të hyrë në restorante dhe bare do të lehtësohen, me një test negativ që mjafton në vend të provave të vaksinimit ose shërimit plus një test ose një injeksion përforcues.
Kufizimet e mbetura “me shtrirje të gjerë” do të hiqen më 20 mars, tha kryetari i bashkisë së Berlinit, por Scholz tha se kërkesat për mbajtjen e maskave dhe distancimin do të mbeten në fuqi.
Vende të tjera, përfshirë Danimarkën fqinje, gjithashtu kanë lëvizur më shpejt për të hequr kufizimet dhe ka pasur thirrje në rritje që Gjermania të ndjekë shembullin. Më herët të mërkurën, Austria njoftoi se do të heqë shumicën e kufizimeve të saj më 5 mars dhe Zvicra tha që shumica e kufizimeve të saj do të hiqen këtë javë.
Qendra kombëtare e kontrollit të sëmundjeve të Gjermanisë ka raportuar disa ditë rënie të lehtë të shkallës së infeksionit në vend, megjithëse mbetet shumë mbi nivelet e para-Omicron.
Edel Strazimiri / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.