Gjermanisë i duhen 20 mld euro – Investimet në modernizimin e internetit kthehen në prioritet
Sado e çuditshme të duket, ekonomia më e madhe Europës ka mbetur mbrapa në drejtim të digjitalizimit dhe teknologjisë. Katër partitë në negociata për koalicionin qeverisës kërkojnë nga Angela Merkel një plan konkret për të modernizuar internetin me brez të gjerë.
Investimet projektohen jo më të ulta se 20 miliardë euro brenda vitit 2025. Të gjitha këto, tashmë janë të shkruara në një dokument zyrtar, i zbardhur vetëm pjesërisht nga agjencia e lajmeve, Reuters. Industria dhe biznesi gjerman në tërësi, i kanë bërë vazhdimisht thirrje politikbërësve që të ndërmarrin hapa para në këtë drejtim, pasi konkurrueshmëria e vendit është duke u dëmtuar nga mungesa e investimeve.
Disa parti të vogla në negociata për qeverinë, si ajo pro biznesit, kërkojnë madje edhe që qeveria gjermane të shesë kuotat e saj në Deutsche Telekom, në mënyrë që të financojë investimet prej 20 miliardë eurosh.
Qeveria gjermane ka 31.9% kuota në Deutsche Telekom. Shitja e gjysmës së këtyre kuotave do të gjeneronte 10 miliardë euro. Konservatorët e Merkel ndërkohë pretendojnë se, financat publike janë bindshëm të mjaftueshme për t`ia dalë mbanë pa nevojën e shitjes së aseteve publike.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.