Gjigantët e gazit industrial Linde dhe Praxair krijojnë një lider global me një vlerë prej $73 mld
Linde, kompania gjermane më e madhe në botë e gazit industrial dhe Praxair, firma amerikane e të njëjtit sektor, ranë dakord për t’u bashkuar në një lider global me një vlerë tregu prej 73 miliardë dollarë.
Marrëveshja bashkon efiçencën operacionale të firmës amerikane me teknologjinë dhe prezencën e fortë në Europë dhe Azi të kompanisë Linde, duke lënë pas konkurrentin francez Air Liquide.
Bashkimi i barabartë, që pritet ende të miratohet nga shumica e aksionerëve të Praxair, përfaqëson një triumf për Wolfgant Reitzle të Linde, ish kreu ekzekutiv që u kthye në president të firmës për të nënshkruar marrëveshjen.
Aksionerët e Linde nuk do të votojnë mbi shkrirjen, por 75% duhet të ofrojnë aksionet e tyre te kompania e re në mënyrë që dakordësia të përfundojë. Reitzle, i cili shkarkoi ish kreun e kompanisë dhe shefin e financave për të vazhduar me shkrirjen pas dështimit në vitin e kaluar, nuk e përdori votën e tij si president i firmës kur kundërshtitë nga sindikatat u tërhoqën.
Anëtarët e sindikatës, që kanë përfaqësim të barabartë në bord me aksionerët nën ligjin gjerman, kishin kërcënuar marrëveshjen, por në fund u tërhoqën për shkak të garancive të punës që ishin kusht për shkrirjen.
Bordi mbikëqyrës i Linde votoi 6 pro 5 kundër ndaj marrëveshjes, ndërsa një përfaqësues i sindikatës ishte abstenim. Kompania e re do të inkorporohet në Irlandë, ku punonjësit nuk do të kenë të njëjtat pozita si në Gjermani mbi strategjitë e kompanisë.
Kompanitë rritën objektivat për reduktimin e kostove nga shkrirja në 1.2 miliardë në 3 vite. Marrëveshja pritet të përfundojë në gjysmën e dytë të 2018-ës, deklaruan kompanitë. Veterani Reitzle, do të jetë presidenti i kompanisë së re, ndërsa lideri i i Praxair, Steve Angel, do të jetë kreu ekzekutiv.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.