Gjiknuri në Himarë: Na ndihmoni të reformojmë administratën

Në kuadër të turit të dëgjesave me qytetarët për çështjet prioritare të qeverisjes së ardhshme, drejtuesi politik i Qarkut të Vlorës Damian Gjiknuri ishte në Bashkinë e Himarës.

Gjatë bashkëbisedimit, Gjiknuri u angazhua për vazhdimin e investimeve në këtë zonë me potenciale të mëdha për zhvillimin e turizmit. Më tej, ai u ndal tek nevojat e banorëve për përmirësimin e shërbimeve publike duke premtuar hapjen e një zyre të hipotekës në këtë Bashki.

“Himarën do ta mbështesim edhe me godinën e re të Bashkisë ku do të jetë edhe zyra e re e shërbimeve brenda. Himara ka një godinë që është gati jo funksionale për madhësinë që ka kjo bashki. Kryetari i Bashkisë e ka bërë projektin dhe me Kryeministrin kemi folur, unë do jem lobues për ta bërë të mundur këtë që ju shërbimet ti merrni në bashkinë tuaj”, u shpreh Gjiknuri.

Ai insistoi tek nevoja për të shmangur sa më shumë nëpunësit por edhe kryerjen e shërbimit nga një rreth në një tjetër siç ndodh me Himarën banorët e të cilës në shumë raste duhet të shkojnë në Vlorë për shërbimet publike.

“Njerëzit mund të aplikojnë nëpërmjet shërbimeve të internetit dhe përgjigjen ta marri po aty në vend. Modernimi i postave dhe zyrave tjera të lidhura në një rrjet informatik do bëjë të mundur që një pjesë të shërbimeve ti thjeshtojë por të gjurmojmë dhe punën e administratës”, theksoi Gjiknuri.

Drejtuesi politik i Qarkut të Vlorës kërkoi ndihmën e qytetarëve për të reformuar administratën publike duke denoncuar problematikat dhe personat konkret që abuzojnë. “Na duhet ndihma juaj, e gjithë qytetarëve. Edhe të na mirëkuptojnë për disa gjëra që duan pak kohë por edhe të na ndihmojnë, sidomos për reformimin e administratës dhe gjërat që janë të shpejta për tu zgjidhur na inkurajoni me ngritjen e problematikave dhe identifikimin e personave përgjegjës”, insistoi Gjiknuri.

Gjatë bashkëbisedimit, banorët e Himarës ngritën disa shqetësime për probleme konkrete me të cilat ndeshen në jetën e përditshme.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.