Gjilani, ‘rekord’ divorcesh – Numrin më të lartë të shkurorëzimeve në vitin 2018!

Gjilani ‘e ka kaluar’ Prishtinën për sa i përket shkurorëzimeve në vitin 2018. Në fakt, jo vetëm Prishtinën, por çdo qytet tjetër të Kosovës. Sipas publikimit më të fundit të Agjencisë së Statistikave të Kosovës, Gjilani është qyteti me numrin më të lartë të divorceve në Kosovë, me 80 të tilla përgjatë vitit të kaluar, mesatarisht, 7 divorce në muaj.

Por ky ‘rekord’, vlen vetëm për divorcet, pasi për kurorëzimet, Gjilani nuk është qyteti me numrin më të lartë të tyre. Sipas ASK, në vitin 2018, Gjilani ka pasur 739 martesa. Nga ana tjetër, kryeqyteti i Kosovës, është qyteti i dytë me numrin më të lartë të kurorëzimeve në vitin 2018, me 1 mijë e 285 të tilla, ndërsa për sa i përket divorceve, për po të njëjtin vit, ka numëruar 68 të tilla.

Ndërsa në Gjilan, janë divorcuar më shumë se në çdo qytet tjetër në vitin 2018, në Prizren, ka pasur më shumë martesa në po të njëjtin vit. Sipas Agjencisë së Statistikave të Kosovës, në vitin e kaluar, Prizreni ka pasur 1 mijë e 589 celebrime, ndërsa divorce, 42 po për 2018-ën.

Jenida Vladi / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.