Gjobat e COVID jashtë kufijve – Qytetarët shqiptarë të aplikojnë për rimbursim deri më 10 Dhjetor

Të gjithë qytetarët shqiptarë, të cilët për shkak të mbylljes së kufijve, kanë tejkaluar afatin e qëndrimit në këto shtete të huaja, gjatë periudhës 10 Mars – 1 Qershor 2020 dhe janë gjobitur, do të kenë afat deri në datën 10 Dhjetor për të dorëzuar dokumentet për rimbursimin e gjobave nga buxheti i shtetit. Drejtoria e Përgjithshme e Tatimeve, bën me dije se individët që kanë kryer tashmë aplikimin, por që, edhe pas njoftimeve në vijimësi nga ky institucion, ende nuk kanë plotësuar mangësitë në dokumentacionin e tyre, duhet ta dërgojnë këtë dokumentacion  brenda datës 10 dhjetor 2020 pranë DPT-së, nëpërmjet shërbimit postar ose në adresën email [email protected], duke mos harruar të vendosin edhe një numër kontakti.

Tatimet njoftojnë se çdo individ, shtetas shqiptar, që është gjobitur në shtetet e huaja, për arsyen e mësipërme, duhet të dërgojë: mandatin e arkëtimit që vërteton kryerjen e pagesës së gjobës, të përkthyer dhe noterizuar; formularin e vendosjes së gjobës nga policia kufitare; vetëdeklarim për pëlqimin e individit për verifikimin e hyrje-daljeve të tij kufitare nga sistemi TIMS, sipas formatit të përcaktuar (sipas formatit bashkëlidhur njoftimit); fotokopje të dokumentit të identifikimit të individit (pasaportë, kartë identiteti); të dhënat individuale të llogarisë bankare në Lekë (emër banke dhe IBAN); numër kontakti personal ose adresë email.

Elisabeta Dosku / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.