Gjobat e konkurrencës – Nuk u mblodhën as në vitin 2017
Gjobat e Autoritetit të Konkurrencës nuk mblidhen. Në raportin e veprimtarisë së vitit 2017, Autoriteti i Konkurrencës bën të ditur se janë 13 vendime me gjoba ende të paekzekutuara, shumica e të cilave janë të bartura prej vitesh.
Arsyeja pse këto vendime nuk ekzekutohen nuk janë plotësisht të qarta as për vetë drejtuesit e Autoritetit të Konkurrencës. Kryetarja, Juliana Latifi, tha gjatë raportit në Komisionin Kuvendor të Ekonomisë, se drejtoria e përgjithshme e përmbarimit shtetëror nuk ka dhënë deri tani shpjegime të qarta pse këto vendime nuk ekzekutohen.
Mosekzekutimi i vendimeve të Autoritetit të Konkurrencës është një problem që raportohet me përpikëri çdo vit nga Autoriteti i Konkurrencës, por që ende nuk po gjen një zgjidhje përfundimtare.
Mosmbledhja e gjobave në praktikë e zhvlerëson penalitetin e vendosur nga Autoriteti i Konkurrencës si instrument për rregullimin e tregut dhe për mospërsëritjen e shkeljeve të tjera në të ardhmen.
Për vitin 2018, Autoriteti i Konkurrencës do të vazhdojë të ketë në vëmendje tregjet strategjikë, si ai i telekomunikacioneve, si edhe koncesionet, kryesisht në rastet kur ato janë transferuar si e drejtë ekskluzive për një operator privat.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.