Gjobat për abuzimet me çmimet e shportës/ Zbardhet formula: Sekuestro mallit deri 100 mijë dollarë. Penalitet e përjashtim nga tenderët për 3 vite

Çdo subjekt që shkel vendimet e Bordit të Transparencës dhe Monitorimit të Çmimeve të shportës do të pëballet me një seri masash të rënda që arrijnë deri te përjashtimi për tre vite nga tenderat publikë e sekuestrimi i gjithë mallit në gjendje. Akti Normativ i Qeverisë parashikon se pesë ditë nga konstatimi i abuzimit, Drejtoria e Përgjithshme e Tatimeve vepron me dhënien e masës përkatëse brenda 5 (pesë) ditëve nga data e konstatimit të shkeljeve.

Marzhi i fitimit i vendosur nga Bordi është i detyrueshëm të zbatohet nga të gjitha subjektet dhe zbatimi i tyre monitorohet nga Drejtoria e Përgjithshme e Tatimeve, nëpërmjet verifikimit të faturave të lëshuara nga subjektet gjatë periudhës së situatës së veçantë të krijuar në treg. Sipas rastit, Bordi mund të vendosë krijimin e një task-force, me përfaqësues nga Drejtoria e Përgjithshme e Tatimeve, Inspektorati Shtetëror i Mbikëqyrjes së Tregut dhe Autoriteti Kombëtar i Ushqimit.

Akti Normativ përcakton se subjektet e tregtimit me shumicë të produkteve ushqimore bazë dhe produkteve të lidhura me to dënohen me gjobë, në masën 10 (dhjetë) milionë lekë; Subjektet e tregtimit me pakicë të produkteve ushqimore bazë dhe produkteve të lidhura me to dënohen me gjobë, në masën 2 (dy) milionë lekë; “Në rast përsëritjeje, masave të përcaktuara në shkronjat “a” dhe “b”, të këtij neni, i shtohet edhe pezullimi i ushtrimit të aktivitetit dhe sekuestrimi i produkteve në gjendje inventari”, përcakton dokumenti qeveritar.

Akti detyron gjithashtu të gjitha subjektet që tregtojnë produkte me shumicë, të nevojshme për furnizimin e popullatës, të marrin masa për mbajtjen e rezervave që tregtojnë, për një periudhë 3-mujore ose në përputhje me jetëgjatësinë e produktit, me qëllim përballimin e situatës së veçantë të krijuar në treg. Mosmarrja e masave nga subjektet private, penalizohet me 100 mijë dollarë për tregtarët e mëdhenj dhe 20 mijë për të vegjlit, ndërkohë që këto subjekte do të përjashtohen nga procedurat e prokurimit publik për një periudhë 3-vjeçare nga Agjencia e Prokurimit Publik.

Lorenc Rabeta / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.