“Gjobat për qeset plastike, të larta” – Tregtarët e ushqimeve, Pogaçi: Mundësi për abuzim nga inspektorët

Tregtarët e produkteve ushqimore i konsiderojnë si tejet të larta gjobat e parashikuara në projektligjin, që synon ndalimin e prodhimit dhe përdorimit të qeseve plastike. Sipas projektligjit të propozuar nga Ministria e Turizmit dhe Mjedisit çdo person që hedh në treg, prodhon, importon apo fut në territorin e Shqipërisë qese plastike mbajtëse, gjobitet nga 1 000 000 – 1 500 000 lekë.

Ndërkohë që, çdo person që i përdor këto qese do të gjobitet me 30 -100 mijë lekë. Por, në një seancë dëgjimore në Komisionin parlamentar të Veprimtarive Prodhuese, Mira Pagaçi nga Bashkimi Tregtar i Shqipërisë tha se ky nivel gjobash krijon edhe mundësi abuzimi nga inspektorët.

Po ashtu, Pogaçi kërkoi që ligji duhet ët përcaktojë qartë se qeset për ambalazhimin e produklteve ushqimore nuk do të ndalohen, pasi në të kundërt lihet vend për keqinterpretime e më pas për vendosjen e gjobave të padrejta ndaj tregtarëve .

Nëse miratohen, ndryshimet ligjore për ndalimin e prodhimit dhe përdorimit të qeseve plastike do të hyjnë në fuqi nga data 1 qershor 2022. Ndërkohë që, këto propozime kanë hasur në kundërshtime të forta nga ana e prodhuesve shqiptare, për shkak të impaktit ekonomik, social dhe juridik që krijon miratimi i tyre.

Ola Mitre / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.