“Gjuetia” e kthimeve të larta – Obligacionet 7-vjeçare, tregu shfaq interes të lartë
Ministria e Financave zhvilloi këtë javë ankandin e obligacioneve 7 vjeçare, që ngelen ndër instrumentet financiare me kthimin më të lartë për investitorët.
Sipas të dhënave nga Ministria e Financave, kuponi ose interesi i obligacioneve rezultoi 5.39%, me një rritje të lehtë nga rezultati 5.24% i muajit mars.
Edhe në instrumentet afatgjata tregu duket se ka gjetur një lloj stabiliteti, pas luhatjeve të ndjeshme të vitit të kaluar.
Tregu ngelet mjaft i interesuar, edhe duke pasur parasysh se kthimet nga investimi janë mjaft të kënaqshme, në kushtet e një mjedisi me norma të ulëta interesi.
Në ankand u paraqitën kërkesa totale në vlerën e 6.5 miliardë lekëve, kundrejt një vlerë prej 4 miliardë lekësh obligacione të shpallura për shitje nga Ministria e Financave.
Sistemi bankar është mjaft likuid dhe ngelet i interesuar për investime në titujt e qeverisë, edhe duke pasur parasysh ecurinë e dobët të kreditimit.
Të dhënat e Bankës së Shqipërisë treguan se edhe për Prillin kreditimi pati një ecuri të dobët, me rënie prej 0.4% krahasuar me të njëjtën periudhë të një viti më parë.
Qeveria shqiptare po e shfrytëzon këtë moment për të rritur peshën e instrumenteve afatgjatë në portofolin e vet të borxhit, duke shfrytëzuar interesat e favorshme dhe duke ulur rrezikun e rifinancimit të shpeshtë.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.