Gjykata administrative – Çështjet e apeluara në rënie, rritet numri i padive për pronat
Rritet numri i padive për pronat në Gjykatën Administrative të shkallës së parë. Kancelari i kësaj gjykate, Arbër Kushe deklaroi për televizionin SCAN se një pjesë e konsiderueshme e padive janë bërë kryesisht nga prefektura e Tiranës për pronat dhe verifikimin e akteve të lëshuara nga krerët e komunave.
“Kam vënë re një trend të padive të ngritura nga prefekti i Qarkut të Tiranës, lidhur me AMTP-të, që janë aktet për marrjen në dorëzim të tokave bujqësore dhe verifikimin e këtyre akteve të lëshuara dikur nga ish-kryetarët e komunave: verifikimin e metrave që secilës nga familjet bujqësore i ka takuar”, u shpreh Kushe.
Sa i takon çështjeve të apeluara në këtë gjykatë gjatë viti 2017, Kushe bën me dije se ky numër është ulur me 652 çështje më pak krahasuar me të njëjtën periudhë të një viti më parë ku në 6 mujorin e parë të 2017-ës u regjistruan 2255 çështje dhe u mor një vendim për 2432 të tjera përfshirë edhe të mbaruara nga viti 2016.
“Të regjistruara kanë qenë 3084, deri më 31 maj 2016 dhe të vendimuara kanë qenë 2739 deri po më këtë datë. Vëremë se në 2017-ën, në të njëjtën periudhë ka patur një rënie të çështjeve të regjistruara dhe të vendimuara. Përkatësisht 2432 kanë qenë të vendimuara deri më 31 Maj 2017 dhe 2255 kanë qenë të regjistruara, që janë në proces shqyrtimi dhe pritet të vendimohen sipas afateve të përcaktuara nga ligji për të gjitha detyrimet që u takojnë gjyqtarëve”.
Kushe bëri me dije se nuk ka ndryshim nga viti i mëparshëm sa i takon numrit të çështjeve të konfliktit që vijnë nga biznesi në gjykatë.
Nertila Doko/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.