Gjykata e Lartë, cilat dosje do “shkarkohen” të parat? – Përparësi rekurseve me vlerë deri 150 mijë lekë dhe 40-fishin e pagës minimale
Ndërsa të paktën 36 mijë dosje presin prej vitesh shqyrtimin në arkivën e Gjykatës së Lartë, kjo e fundit po studion mënyrat për shkarkimin në bllok të sa më shumë prej rekurseve me natyrë të ngjashme apo me vlera të ulëta financiare. Në planveprimin e Gjykatës për trajtimin e cështjeve të prapambetura, mësohet se prioritet do t’I jepen rekurseve me të meta proceduriale, si dhe cështjeve administrative apo civile me kosto të ulëta.
Në planin e veprimit theksohet se për të tre kolegjet që ka aktualisht Gjykata e Lartë është vendosur që rekurset për çështjet, të cilat nuk plotësojnë kushtet formale për t’u shqyrtuar nga Gjykata e Lartë, të shqyrtohen me përparësi.
“Kështu, në këtë kategori janë përfshirë rekurset e paraqitura jashtë afatit ligjor, rekurset për çështjet, në të cilat vlera e padisë nuk kalon 40 fishin e pages minimale (në fushën administrative) ose vlerën e padisë nën 150.000 lekë (në fushën civile), rekurset për të cilat është paraqitur kërkesa për heqje dorë etj”, theksohet në dokument.
Për t’u theksuar është se këto lloj cështjesh, ku përfshihen padi për vitet e pensioneve apo të punësimit, numërohen me qindra e me mijëra e nëpër arkivat e Gjykatës së Lartë.
Gjë që mund të lehtësojë stikun prej mbi 36 mijë dosjesh, por jo t’I japë zgjidhje përfundimtare. Ditët e fundit të vitit që sapo lamë pas, Gjykata e Lartë se stoku ka prirje të rritet për shkak të rekurseve të reja. Ajo fajësoi për këto rekurse avokatët e papërgjegjshëm, por edhe institucionet shtetërore të cilët bëjnë rekurse të panevojshme.
Lorenc Rabeta / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.