Gjykata e lartë funksionale në dhjetor? – KLGJ: Do të ketë 10 anëtarë brenda 5 dhjetorit përmes procedurës së ngritjes në detyrë
Ndërsa aktualisht numëron vetëm 3 anëtarë, një Udhëzim I miratuar nga Këshilli I Lartë Gjyqësor përcakton hapat që do të ndiqen për të bërë funksionale Gjykatën e Lartë brenda dhjetorit të këtij viti. “Mbështetur në dakordësinë tonë kolektive, vlerësojmë se aktualisht Gjykata është në gjendje “funksionaliteti minimal”, dhe synimi ynë i përbashkët është të ndërmarrim hapat e nevojshme që Gjykata të arrijë sa më shpejt “funksionalitet optimal” dhe brenda vitit 2020”, thekson KLGJ në Udhërrëfyesin për Funksionalitetin e Gjykatës së Lartë 2020-2021.
Në dokument, KLGJ përcakton një plan veprimi për ngritjen në detyrë të 7 gjyqtarëve të cilët do të bëhen anëtarë të Gjykatës së Lartë brenda dhjetorit të këtij viti, si dhe një numër të konsiderueshëm këshilltarësh ligjorë e stafi administrativ, por edhe një kancelari. Pikësynimi është që Gjykata e Lartë të ketë 10 gjyqtarë brenda 5 dhjetorit të vitit 2020.
Shkak për të cilin KLGJ ka parashikuar një mekanizëm zhbllokues që lejon gjyqtarët e pavetuar të ngrihen në detyrë, përmes një procesi të brendshëm verifikimi të kryer nga vetë Këshilli kur organet e vetingut nuk e finalizojnë vetingun e kandidatëve brenda një afati tre mujor. Mekanizëm që gjithsesi mund të rezultojë thikë me dy presa, pasi nëse ndonjë prej gjyqtarëve të ngritur në detyrë do të rrëzohej nga Vetting-u, do të përbënte një goditje të rëndë për reputacionin e Gjykatës së Lartë. “Megjithatë, kjo zgjidhje sjell si pasojë rrezikun e konsiderueshëm për të cenuar reputacionin e Këshillit dhe legjitimitetin e Gjykatës, nëse kandidati ngrihet në detyrë dhe më pas shkarkohet nga KPK apo Kolegji i Posaçëm i Apelimit”, shkruan në Udhërrëfyes KLGJ.
Lorenc Rabeta / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.