Gjykata e Lartë me 7 anëtarë – Shkarkohen dy anëtarë në një ditë, Admir Thanza e Tom Ndreca
Pas gjykatës Kushtetuese, ka qenë ajo e Larta të marrë një godite të rëndë nga Vetting-u, duke mbetur me vetëm 7 anëtarë, nga 19 të përcaktuar me ligj. Komisioni i Pavarur i Kualifikimit ka shkarkuar mëngjesin e së martës dy anëtarë të saj, Tom Ndrecën dhe Admir Thanzën.
Akuzat më të cilat u përball Gjyqtari Admir Thanza nisën nga deklarimi i rremë i pasurisë, te kontaktet e dyshimta me njerëz të lidhur me botën e krimit, te fshehja e një procedimi penal të nisur ndaj tij, e deri te një dënim për vjedhje në Itali, i zbuluar nga Operacioni Ndërkombëtar i Monitorimit, i njohur ndryshe si ONM. Ndërkohë që edhe raportet e ILDKPI-së, DSIK-e dhe Këshillit të Lartë të Drejtësisë e kishin përkufizuar Thanzën si person me probleme me pasurinë, me pastërtinë e figurës, por edhe me performacën profesionale.
ONM zbuloi se Thanza ka qenë i dënuar në Pisa të Italisë në vitin 1999, me 40 ditë burg për vjedhje. Është vërtetuar se ai ka qenë i ndaluar në flagrancë gjatë kryerjes së krimit dhe prezent n9 sallën e gjyqit. Vetë Thanza pranoi dënimin, por jo kryerjen e krimit, duke u justifikuar se e ka marre persipër per humanizem per te ndihmuar nje person. Gjatë shpjegimeve ai përmendi se krimin e kishte marrë përsipër për llogari të kunatës, për të bërë të mundur kurimin e të nipit në Itali.
Ndërkohë që shkak për shkarkimin e Ndrecës u bënë problemet me pasurinë dhe mosdeklarimi i precedentëve penalë të kunatit të tij. i është dashur të japë shpjegime për dy apartamente në Tiranë, një prej të cilëve me garazh, dhe një në Plazhin e Golemit, përkatësisht me sipërfaqe 120, 92 dhe 31 metra katrorë. Gjyqtarit iu desh të jepte sqarime edhe për disa llogari bankare të tijat, si dhe të familjarëve, për të cilat është shprehur se bëhet fjalë për lapsuse në plotësimin e vetëdeklarimit të pasurive.
Problem për Ndrecën qe edhe arrestimi i kunatit të tij me inicialet NGJ, të cilin gjyqtari nuk e kishte pasqyruar në deklaratën e pastërtisë së figurës, Ky i fundit është arrestuar për prodhim dhe shitje narkotikësh, ndërkohë që hetimet ndaj tij janë pushuar nga Prokuroria e Shkodrës. Nën akuzë për fshehje të lidhjeve të dyshimta, Gjyqtari u mbrojt duke thënë se sasia që i ishte kapur kunatin qe për përdorim vetjak, dhe se nuk bëhet fjalë për një person të lidhur me krimin e organizuar.
Lorenc Rabeta/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.