Gjykata e prokurori, rritet siguria – Punonjës sigurie edhe në sallë, kontroll fizik e ndalim sendesh, forcë në rastet e nevojshme

Kontroll fizik në hyrje, regjistrim i sendeve apo ndalim i futjes së tyre, deri te prania në sallën e gjyqit të punonjësit të sigurisë nëse kjo vlerësohet e nevojshme nga gjyqtarët. Përmes një vendimi që mban datën 8 korrik, Këshilli i Ministrave u ka kërkuar KLP-së e KLGJ-së të hartojnë rregullore me masa të shtuara për sigurinë e gjyqtarëve e prokurorëve, si dhe në ambjentet përkatëse.

“Siguria e ambienteve”, i referohet ndalimit të hyrjes së paligjshme, dëmtimit dhe kryerjes së akteve të dhunshme ndaj ambienteve, sjelljes së eksplozivëve, të armëve ose të sendeve të tjera që mund të përdoren si armë ose çdo aktiviteti tjetër të paligjshëm ndaj ambienteve të gjykatës apo prokurorisë.

Shtimi I masave të sigurisë do aplikohet në çdo drejtim, duke nisur nga ambientet e brendshme të gjykatës apo të prokurorisë dhe trualli funksional përreth tyre, duke përfshirë pjesët e përbashkëta me ndërtesën kryesore, parkingun për automjetet, si dhe çdo objekt tjetër Brenda perimetrit rrethues të godinës, që përdoret në funksion të ushtrimit të veprimtarisë të gjykatës dhe të prokurorisë.

Punonjësit e sigurisë do të garantojnë ndalimin e hyrjes për personat, të cilët paraqesin rrezik për sigurinë e personave ose të godinës së institucionit përkatës; ndërkohë që do ushtrojnë kontroll personal nëpërmjet pajisjeve teknike dhe inspekton çantat e personave që hyjnë në ambientet e brendshme të institucionit. Punonjësit e sigurisë kanë gjithashtu detyrën për bllokimin e përkohshëm të sendeve, mbajtja dhe futja në institucion e të cilave  është e ndaluar ndërkohë që janë të autorizuar të përdorin deri forcën fizike në përputhje dhe proporcion me rastet që e kanë diktuar atë dhe aq sa është e nevojshme për të shmangur apo neutralizuar situatën e rrezikut të krijuar.

Lorenc Rabeta / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.