Gjykata Kushtetuese me 5 anëtarë – Votohet Altin Binaj: Gjoni: Përse nuk kemi 3 kandidatura por vetëm 1? Hysi: Këshillë e Venecias

Nga kjo e enjte Gjykata Kushtetuese numëron pesë anëtarë dhe është në pritje të caktimit të dy emrave të tjerë që janë kompetencë e Presidentit Ilir Meta. Kuvendi miratoi emrin e Prokurorit Altin Binaj si anëtar të kësaj Gjykate, i dërguar nga Këshilli i Emërimeve në Drejtësi, pas presionit të fortë nga faktori ndërkombëtar.

Gjithsesi votimi u parapri nga debate. Deputeti i Opozitës Parlamentare Ralf Gjoni akuzoi se po shkelej ligji dhe Kushtetuta, pasi Deputetët duhet të zgjidhin mes tre kandidaturave të miratuara nga Këshilli i Emërimeve në Drejtësi, ndërkohë që Binaj ishte i vetmi emër të enjten në listën e dërguar nga KED.

Zëvendëskryetarja e Kuvendit, Vasilika Hysi, në përgjigje tha se emergjenca në të cilën ndodhet kjo gjykatë, bashkë me këshillën e Komisionit të Venecias, por edhe kushti që ka vënë BE për çeljen e negociatave, e bën të pranueshme pranimin e tij si kandidaturë e vetme.

Prokurori Altin Binaj ishte i vetmi që kaloi sitën e Këshillit të Emërimeve në Drejtësi si kandidaturë për gjykatën Kushtetuese.

Lorenc Rabeta / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.