Gjykata rrëzon Boris Johnson – Pezullimi i parlamentit, i jashtëligjshëm. Deputetët mund të rikthehen
Gjykata e Lartë e Mbretërisë së Bashkuar vendosi se Kryeministri Boris Johnson ka vepruar në mënyrë të jashtëligjshme kur ka këshilluar Mbretëreshën Elizabeta që të pezullojë parlamentin disa javë përpara Brexit. Vendimi i jep mundësinë deputetëve që të rikthehen në parlament, ku Boris Johnson i mungon mazhoranca. Deputetët, që kundërshtojnë daljen pa marrëveshje nga Bashkimi Europian, kanë tashmë mundësinë që të ndalojë strategjinë e kryeministrit. Presidentja e Gjykatës së Lartë, Brenda Hale, tha se ndërprerja ishte e jashtëligjshme për shkak se parandalonte parlamentin në ndërmarrjen e funksioneve kushtetuese pa ndonjë arsye
“Vendimi për të këshilluar Mbretëreshën që të ndërpresë parlamentin ishte e jashtëligjshme për shkak se parandaloi aftësinë e parlamentit që të ndërmarrë funksionet kushtetuese pa pasur ndonjë justifikim. Vendimi unanim i 11 gjyqtarëve është se parlamenti nuk duhet pezulluar. I takon tashmë kryetarit të parlamentit dhe vetë deputetëve që të vendosin se çfarë do të bëjnë,” u shpreh Hale.
Parlamenti është pezulluar për 1 muaj nga data 10 Shtator dhe kjo u miratua nga Mbretëresha me këshillë ne Kryeministrit. Kryetari i dhomës së ulët në Parlament, John Bercoë, tha se e mirëpret vendimin e gjykatës. Shumë deputetë, përfshirë vetë konservatorët, kanë thënë se Boris Johnson duhet të japë dorëheqjen nëse zbulohet se ka udhëzuar në mënyrë të gabuar Mbretëreshën.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.