Gjykatat, të boshatisura nga Vetting-u – KLGJ krijon njësitë e shërbimit ligjor në të gjitha apelet për të asistuar gjyqtarë

Gjykatat e Apelit, të cilat janë aktualisht më të goditurat nga procesi i Vetting-ut, do të mbështeten nga një numër i konsiderueshëm ndihmësish ligjorë për të amortizuar mungesën e gjyqtarëve të shkarkuar.  Përmes një vendimi të KLGJ-së, janë krijuar njësitë e shërbimit ligjor, të cilat do të jenë e strukturës së gjykatave. Në vendimin e publikuar tashmë në Fletoren Zyrtare sqarohet se njësitë janë krijuar me propozimin e Komisionit të Vlerësimit të Etikës dhe Veprimtarisë Profesionale, të Këshilli të Lartë Gjyqësor.

Do të jetë Gjykata e Apelit Tiranë që do të ketë njësinë e shërbimit më të madh me 15 ndihmës ligjorë; Gjykata e Apelit Durrës do të ketë 6 ndihmës ligjorë; ) Gjykata e Apelit Gjirokastër do ketë 3 ndihmës ligjorë;  Gjykata e Apelit Korçë do ketë 3 ndihmës ligjorë; Gjykata e Apelit Shkodër – 5 ndihmës ligjorë; Gjykata e Apelit Vlorë – 6 ndihmës ligjorë.

Një numër të konsiderueshëm ndihmësish janë parashikuar edhe për Gjykatën e Apelit Administrativ, e cila është ndër më problematiket kur vjen fjala te numri i dosjeve të akumuluara.

Ndërkohë që Gjykata e Posaçme e Apelit për Korrupsionin dhe Krimin e Organizuar do të ketë një njësi mbështetëse prej 5 ndihmës ligjorë. Pas Gjykatës Kushtetuese dhe asaj të Lartës, që praktikisht nuk janë ende funksionale, Gjykatat e Apelit janë ndër më goditurat nga vakancat e shumta. Raportohet se në disa prej apeleve, çështjet vonohen edhe me 500 ditë.

Lorenc Rabeta / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.