Gjyqtarët, kredi me 0% interes – Favori i radhës për magjistratët, KLGJ e KLP do u financojnë huatë për shtëpi
Ndërsa kanë pagat më të larta në administratë, dhe ndërsa shpesh kanë abuzuar me kreditë e buta, gjyqtarët e prokurorët përfitojnë favorin e radhës për shkak të statusit të magjistratit. Një vendim i Këshillit të Ministrave që mban datën 15 janar i jep çdo magjistrati që vërteton se është i pastrehë të përfitojë kredi me 0% interes nga bankat tregtare. Sipas vendimit, interesat do të financohen tërësisht nga ana e KLP për prokurorët dhe KLGJ për gjyqtarët, ndërkohë që përcaktohet madje se apartamentet duhet të jenë të pozicionuara në qendër të qyteteve ku magjistratët ushtrojnë detyrën.
“Magjistrati ka të drejtë që të përfitojë vetëm një herë kredi hipotekore, interesat e së cilës financohen nga shteti, kur ka ushtruar detyrën për një periudhë jo më pak se tre vjet pa ndërprerje dhe ka nevojë për banim, në shumën e vlerës mesatare të një apartamenti prej 50 m2, në zonën e qendrës së qytetit ku ai ushtron detyrën. Për çdo anëtar të familjes, i cili jeton në të njëjtën banesë me magjistratin, masa referuese e sipërfaqes së banesës në fjalë shtohet me 10 m2 për person”, përcakton vendimi i Qeverisë.
Me nevojë për banesë, sipas këtij vendimi, kuptohen rastet kur magjistrati nuk disponon shtëpi banimi për strehim ose kur disponon banesë në pronësi me sipërfaqe sa ose më të vogël se ato të përcaktuara në legjislacionin në fuqi për normativat e projektimit të banesave.
Megjithatë, kur gjatë apo pas zbatimit të kredisë rezultojnë se në kërkesë janë bërë deklarime të rreme apo magjistrati nuk gëzon më statusin si magjistrat, si pasojë e shkarkimit nga detyra, kredia konvertohet drejtpërdrejt në kredi tregtare, kusht i përcaktuar edhe në kontratën e kredisë. Në këtë rast, magjistrati është i detyruar të kthejë interesin e paguar nga shteti për kredinë sipas marrëveshjes.Qeveria përcakton në vendim se fondet e subvencionimit të interesave të kredive planifikohen në buxhetin e këshillit respektiv, KLP e KLGJ, dhe i çelen Entit Kombëtar të Banesave në llogari të tij.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.