Glauk Konjufca zgjidhet kryetar i Kuvendit të Kosovës me flamurin kombëtar. Hapet rruga për formimin e qeverisë Kurti
Në Kosovë ka filluar konstituimi i legjislaturës së tetë të Kuvendit, ndërkohë që më vonë gjatë ditës pritet edhe votë-besimi i qeverisë së re.
Pas ngritjes së Komisioneve parlamentare, Kuvendi ka votuar kryetarin e ri të saj të propozuar nga Lëvizja Vetëvendosje, Glauk Konjufcën me 69 vota pro, 33 kundër dhe asnjë abstenim. Ndërkohë një detaj interesant është se kryetarit të ri i është vendosur menjëherë një flamur shqiptar në karrigen e tij dhe që pritet mbetet aty gjatë vazhdimit të seancës.
Procesi ka vijuar me përzgjedhjen e nënkryetarëve, ku, VV-ja ka propozuar Saranda Bogujevcin, Partia Demokratike e Kosovës ka propozuar Bedri Hamzën dhe Lidhja Demokratike e Kosovës ka propozuar Kujtim Shalën.Të propozuarit janë votuar me 107 vota pro, 6 kundër dhe asnjë abstenim.
Lista Serbe për nënkryetarë të Kuvendit ka propozuar Sllavko Simiqin ndërsa partitë tjera joshumicë kanë propozuar Bekim Arifin. Të dy të propozuarit janë zgjedhur me 91 vota pro, 6 kundër dhe 10 abstenime
Vetëvendosje i ka fituar zgjedhjet e 14 shkurtit me 50.28 për qind të votave dhe do të ketë 58 ulëse në Kuvend nga 120 sa janë. Për të formuar një shumicë qeverisëse, Kurtit i duhen 61 vota dhe tre prej tyre pritet të vijnë nga komunitetet joserbe, pasi e ka shprehur hapur se nuk do të bashkëpunojë me qeveritë që kanë qenë në pushtet.
Kurti është shprehur rreth formimit të qeverisë se: “Jemi duke bërë përgatitjet. Shpresojmë më të mirën dhe gjasat i kemi shumë të mira”.
G.K / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.